“Киноны нүүдэл” олон улсын сургалтын хөтөлбөр нь Кино урлагийг дэмжих сангаас санхүүжилтийн дэмжлэг авч, хэрэгжиж буй энэ оны гурав дахь төсөл бөгөөд тус сангийн дэмжлэгтэйгээр “АЛДАГДСАН ӨДРҮҮД” хүүхдийн кино, “АЛТАН ӨРГӨӨ” Олон улсын кино наадам зэрэг төсөл, арга хэмжээнүүд амжилттай хэрэгжиж буй.
Монгол улсын Соёлын Яам, Монголын Үндэсний Кино Урлагийн Зөвлөлийн дэмжлэгтэйгээр Иргэдийн Цахим Оролцоо ТББ-аас зохион байгуулж буй “КИНОНЫ НҮҮДЭЛ” олон улсын сургалтын хөтөлбөрийн хүрээнд “КИНО ЗОХИОЛ БИЧИХ”, “КИНО ТӨСӨЛ БОЛОВСРУУЛАХ” сэдэвт онлайн сургалт зохион байгуулахаар болжээ.
Улмаар киноны зохиол бичих ур чадвараа ахиулах, хөгжүүлэх мөн кино төслийг олон улсын стандартад нийцүүлэн боловсруулалтыг хийж сурах хүсэлтэй киноны уран бүтээлчид доорх холбоосоор хандан “КИНОНЫ НҮҮДЭЛ” хөтөлбөрийн сургалтуудад бүртгэж эхэлсэн байна.
“КИНОНЫ НҮҮДЭЛ” хөтөлбөрийн хүрээнд 2023 оны наймдугаар сарын 1-22-ны өдрүүдэд Австрали, Шинэ Зеаланд, Дани, Итали, Франц, Испани зэрэг дэлхийн киноны салбарын шилдэг найман зөвлөх, таван багш “Кино зохиол бичих”, “Кино төсөл боловсруулах” сэдвийн хүрээнд дөрвөн долоо хоногийн цахим сургалтыг удирдан явуулах юм.
