Манай улс шиг эрс тэс уур амьсгалтай, дулааны улиралдаа багтааж бүтээн байгуулалтын ажлаа өрнүүлдэг орны хувьд зуныг үр бүтээлтэй өнгөрүүлэх нь нэн чухал. Тиймээс энэ саруудад мэргэжлийн болон техникийн боловсрол сургалтын байгууллагад суралцагчид дадлагажих нөхцөл боломжийг бүрдүүлэх нь чухал юм.
Техник технологийн коллеж болон дээд сургуулийн оюутнуудыг дадлагад гарахаас өмнө GIZ Глобал боловсрол төсөл, АХБ-ны дэмжлэгтэйгээр зөөлөн ур чадварын богино хэмжээний сургалтад хамруулж байна. Мэргэжлийн ур чадвараас гадна багаар ажиллах, цаг баримтлах, бусадтай харилцах, бүтээлч хандлагатай байх зэрэг чадваруудыг энэ сургалтаар олгодог байна. Бусад сургуулиуд ч энэ жишгээр дадлага бүрийн өмнө зөөлөн ур чадварын сургалтад оюутнуудаа хамруулах нь чухал юм.
