Оюуны спортын төрөлд эх орныхоо нэрийг өндөрт гаргаж буй ихэр тамирчид гэдгээрээ олонд танигдсан ой тогтоолтын олон улсын их мастер, дэлхийн аварга Н.Мөнхшүр, Н.Энхшүр нар ээлжит сорилдоо оролцохоор өчигдөр өмнөд хөршийг зорилоо. Тэд Хятадын хамгийн олон үзэгчтэй “The brain” шоу нэвтрүүлэгт оролцож, ур чадвараа толилуулахаас гадна тус улсын шилдэг тамирчидтай өрсөлдөх юм байна. Улс улсын шилдэг тамирчид, мастерууд хүний оюун ухаан, тархины гайхамшигт чадварыг харуулсан даалгавар гүйцэтгэж өрсөлддөг нь энэ нэвтрүүлгийн гол онцлог аж. Монголын оюун ухааны академийн тамирчин, олон улсын их мастер Э.Энхмөнх 2016 онд үүнд оролцож, ялалт байгуулжээ. Харин ихэр тамирчдын хувьд өмнө нь Герман, Британи, Америк, Солонгос, Швед зэрэг орны шилдгүүдийг ялсан бол энэ удаа зохион байгуулагч орны мастеруудтай өрсөлдөх нь. Ташрамд дурдахад, Н.Мөнхшүр, Н.Энхшүр нар 30 минутад 5325, 5445 цифр тогтоож, алдаагүй нэрлэсэн амжилтаар 2018 онд Гиннесийн номд нэрээ мөнхөлсөн юм.
Өчигдрөөс илүү маргаашийг
бүтээхийн төлөө
