Боловсрол, шинжлэх ухааны сайд Л.Энх-Амгалан өнөөдөр “Medle” анхны цахим сургуулийн багш нарт компьютер, тоног төхөөрөмж гардуулан өглөө. Хүүхэд бүрд чанартай боловсролыг тэгш, хүртээмжтэйгээр олгох зорилготой цахим сургуулийн багш нар ийнхүү хичээлийн хамгийн чухал хэрэглэгдэхүүн болох тоног төхөөрөмжөөр хангагдлаа. Өнөөдрийн байдлаар цахим сургуульд 21 аймаг, 9 дүүрэг 499 сургуулийн 10 дугаар ангийн 10 мянга гаруй сурагч суралцаж байна. Нийт 148 багш 16 судлагдахууныг зааж байгаа юм.
Цаашид 10-12 дугаар ангийн сурагчдыг бүрэн хамруулахын зэрэгцээ хилийн чинадад амьдарч буй монгол хүүхдүүдэд “Монгол хэл, соёлын хөтөлбөр”-ийг цахим сургалтаар эзэмшүүлж, ерөнхий боловсролын гэрчилгээ, үнэмлэхийг дүйцүүлэн авах боломжоор хангана. Боловсролын салбарын шинэчлэлийн үндэс болсон цахим шилжилтийн анхны сургуулийн багш нарт хичээл, сургалтын өндөр амжилтыг Боловсрол, шинжлэх ухааны сайд хүслээ.
