"KHANBOGD CASHMERE"-ийнхан зураг авалтад орсон моделийн ажлын хөлсийг өгөхгүй олон сар болсон талаар Мисс Т.Батцэцэг өөрийн цахим хуудсандаа нийтэллээ. Тодруулбал тэрбээр,
"KHANBOGD CASHMERE"-ийн зураг авалтад 13, 14 цаг ажилласан хөлсөө авч чадахгүй дөрвөн сар боллоо. Ийм "золбин" байж болохгүй л дээ. Энэ салбарт 14, 15 жил ажиллахдаа ийм зүйл үзэж явсангүй ээ. Буянаараа болог, чихэр авч идээрэй" гэжээ.
Энэ талаар Мисс Т.Батцэцэгээс тодруулахад "Хэдэн төгрөгийн цалин авсан болон бусад зүйлийн талаар дэлгэрэнгүй мэдээлэл өгмөөргүй байна" гэв.
Харин "KHANBOGD CASHMERE"-ийн маркетинг, борлуулалтын албаны мэргэжилтнээс тодруулахад "Бид Т.Батцэцэгт зураг авалтын хөлсийг олгосон. Энд үл ойлголцол гарсан байх. Санхүүгээсээ мөнгийг нь шилжүүлсэн эсэхийг дахин тодруулаад, цалинг нь олгоогүй бол олгох арга хэмжээ авъя" гэлээ.
