Улсын Их Хурлын Хууль зүйн байнгын хорооны өнөөдрийн (2021.10.19) хуралдаан 14.24 цагт 11 гишүүний ирцтэй эхэлж, Хуульчийн эрх зүйн байдлын тухай хуулийн шинэчилсэн найруулгын төслийн хамт өргөн мэдүүлсэн Монгол Улсын Ерөнхийлөгчийн тухай хуульд өөрчлөлт оруулах тухай хуулийн төслийн анхны хэлэлцүүлгийг хийлээ. Монгол Улсын Их Хурлын чуулганы хуралдааны дэгийн тухай хуулийн 39 дүгээр зүйлийн 39.10-т “Байнгын хороо хуулийн төслийг зүйл бүрээр хэлэлцэнэ” хэмээн заасан байдаг. Энэ дагуу төслийг зүйл бүрээр хэлэлцсэн юм. “Шүүхийн ерөнхий зөвлөлийн дарга, гишүүдийг хуульд заасны дагуу томилж, чөлөөлнө” гэсэн Монгол Улсын Ерөнхийлөгчийн тухай хуулийн 12 дугаар зүйлийн 12.18 дахь хэсгийг хасах төслийн нэгдүгээр зүйлтэй холбогдуулан асуулт асуух, санал хэлэх шаардлагагүй хэмээн гишүүд үзлээ. Энэ үеэр Улсын Их Хурлын гишүүн Ж.Сүхбаатар, хариулт авсан. Хууль зүйн байнгын хороон дарга С.Бямбацогт түүний асуултад 2021 оны арваннэгдүгээр сарын дундуур Шүүхийн сахилгын хороо байгуулагдана" гэх хариулт өглөө. Үргэлжлүүлэн төслийн хоёрдугаар зүйлтэй холбогдуулан Улсын Их Хурлын гишүүн С.Бямбацогтын гаргасан саналын томьёоллоор санал хураалт явуулан шийдвэрлээд, төслийн анхны хэлэлцүүлгийг хийсэн талаарх Хууль зүйн байнгын хорооны санал, дүгнэлтийг чуулганы нэгдсэн хуралдаанд танилцуулахаар боллоо.
