Хүний эрхийн Үндэсний Комиссын даргын үүргийг түр орлон гүйцэтгэгч, гишүүн Ж.Хунан, гишүүн Д.Сүнжид, референт Х.Цэцгээ нар Насан туршийн боловсролын үндэсний төвийн захирал Л.Болортунгалаг, Үйл ажиллагааны дарга С.Амарсайхан нарыг хүлээн авч, хамтран ажиллах асуудлаар ярилцлаа.
Насан туршийн боловсролын төв нь 518 багштай бөгөөд улсын хэмжээнд үндсэн зургаан чиглэлээр боловсрол олгох ажлыг зохион байгуулдаг болно. Хүний эрхийн Үндэсний Комиссын гишүүд Коронавируст халдвар (Ковид-19)-ын цар тахлын үед хүний эрхийн мэдлэг, боловсролоос хамаарсан хүний эрхийн зөрчил түгээмэл байгаа, хүний эрхийн мэдлэг, соёлыг түгээхэд тус төвийн үүрэг, оролцоо чухлыг тэмдэглээд багш нарыг чадавхжуулах, сургалтын хөтөлбөрийг шинэчлэх, иргэдэд өсөхөөс нь насанд хүртэл нь хүний эрхийн мэдлэг олгох нөлөөллийн ажлыг хамтран зохион байгуулахаар тохиролцлоо.
