Төрийн албан хаагчдыг ёс зүйн зөрчлөөс урьдчилан сэргийлэх зорилгоор Төрийн албаны зөвлөлөөс хаврын эхний сургалтыг “Төрийн үйлчилгээний чанар” сэдвээр Удирдлагын академитэй хамтран зохион байгууллаа. Сургалтад Төрийн албаны зөвлөлийн дарга, гишүүд, ЗГХЭГ-ын төрийн албаны хүний нөөцийн удирдлага, зохицуулалтын газрын албан хаагчид, Төрийн албаны зөвлөлийн Ажлын албаны албан хаагчид болон салбар зөвлөлийн нарийн бичгийн дарга, гишүүд, холбогдох байгууллагын хүний нөөцийн ажилтнуудын төлөөлөл 200 гаруй албан хаагчид оролцсон бөгөөд багаар ажиллан, төрийн үйлчилгээний чанарын талаар мэдээлэл авч, харилцан санал солилцсон юм. Сургалтын үеэр Төрийн албаны зөвлөлийн дарга Б.Баатарзориг “Төрийн албан хаагчдын ажлын гол үзүүлэлт нь төрийн үйлчилгээний чанар бөгөөд төрийн үйлчилгээнд иргэд сэтгэл ханамжтай байх эсэх, цаашлаад иргэдийн амьдралын чанарт өөрчлөлт гарч байгаагаар чанарыг хэмждэг. Төрийн үйлчилгээний чанар албан хаагчийн үйл ажиллагаанаас ихээхэн хамаардаг. Төрийн албаны нэр хүнд нь төрийн албан хаагч нэг бүрийн үйл ажиллагааны нэгдэл тул албан хаагч бүр төрийн албаны нэр хүндийг эрхэмлэн, иргэдэд стандартын дагуу хүлээлтэд нь хүрсэн үйлчилгээг шуурхай үзүүлж сэтгэл ханамжтай байлгах, улмаар төрийн чанартай үйлчилгээгээр дамжуулан төр иргэн хоорондын итгэлцлийг бэхжүүлэхийн төлөө зорьж ажиллах”- ыг зөвлөлөө.
