Нийслэлийн хэмжээнд нийт 420 гэр оронгүй, тэнэмэл амьдралтай иргэдийг түр хоноглох, байршуулах үйлчилгээнд хамруулж аливаа эрсдэлээс урьдчилан сэргийлжээ. Нийслэлийн ЗДТГ-ын Нийгмийн бодлогын хэлтэс, Нийслэлийн Нийгмийн халамжийн газар болон холбогдох байгууллагууд хамтран ажиллаж орон гэргүй, тэнэмэл амьдралтай 248 иргэдийг “Ковид-19”-ийн шинжилгээнд хамруулж Нийгмийн хамгааллын тусгай төв болон зургаан төрийн бус байгууллагуудад байрлууллаа. Тодруулбал, нийслэлийн томоохон худалдааны төв, захууд, авто вокзалууд, орц хонгил, гудамж талбайд хоноглон тэнүүчилж амьдарч байгаа, архины хамааралтай гэр орноосоо дайжсан, орон гэргүй иргэдийг илрүүлэн бүртгэлжүүлж, тэдгээр иргэдийг аливаа эрсдэлээс урьдчилан сэргийлэх, Коронавируст халдвараас хамгаалах арга хэмжээг авч ажилласан юм. Дүүргүүд дэх Цагдаагийн газар, хэлтсүүд хариуцсан нутаг дэвсгэртээ гэр оронгүй, тэнэмэл байдлаар амьдардаг иргэдийг олж тогтоох, цуглуулах, бүртгэлжүүлэх ажлыг зохион байгуулж 715 орон сууцны 1562 орц, хонгил, 63 барилга байгууламж, зургаан хүнсний зах, худалдааны төв, 46 дулааны худаг, гурван төвлөрсөн хогийн цэгт үзлэг шалгалт хийсэн. Ингэснээр гэр оронгүй 248 иргэнийг олж тогтоон, бүртгэлжүүлэн судалгаа бүртгэлийг Нийслэлийн Засаг даргын дэргэдэх Нийгмийн хамгааллын тусгай төв, нийслэлд түр байршуулах үйлчилгээ үзүүлдэг төрийн бус зургаан байгууллагад тус тус хүлээлгэн өгсөн юм. Арга хэмжээний хүрээнд 102 иргэнийг Нийгмийн хамгааллын тусгай төвд, 136 иргэнийг түр хоноглох үйлчилгээ үзүүлж байгаа зургаан төрийн бус байгууллагад байршуулан 10-н иргэнийг гэр бүлд нь эргэн нэгтгэлээ. Нийгмийн хамгааллын тусгай төвүүдэд 182 орон гэргүй тэнэмэл амьдралтай иргэд байршиж байсан бөгөөд дээрх арга хэмжээг зохион байгуулснаар нийслэлийн хэмжээнд нийтдээ 420 гэр оронгүй, тэнэмэл амьдралтай иргэдийг түр хоноглох байршуулах үйлчилгээнд хамруулж аливаа эрсдэлээс урьдчилан сэргийлээд байна. Энэ үеэр Нийслэлийн цагдаагийн удирдах газар, нийслэлийн төвийн зургаан дүүрэг дэх Цагдаагийн газар, хэлтсийн нийт 500 алба хаагч үүрэг гүйцэтгэж ажиллав. Мөн Коронавируст халдварын шинжилгээнд 24 эмч, эмнэлгийн ажилтнууд ажиллаж, орон гэргүй иргэдэд түргэвчилсэн оношлуураар шинжилгээ хийхэд хариу сөрөг илэрсэн бөгөөд, PCR шинжилгээг авч ЗӨСҮТ рүү илгээлээ.
