УИХ-ын анхдугаар чуулганы өнөөдөр хаалаа. Чуулганыг хааж УИХ-ын дарга Г.Занданшатар үг хэлэв.
УИХ-ын найм дахь удаагийн сонгуулиар бүрэлдсэн парламентын анхдугаар чуулган хуулийн хугацаандаа өндөрлөж хэлэлцэх асуудлаа шийдвэрлэснийг УИХ-ын дарга Г.Занданшатар онцлон тэмдэглээд, цаашид энэ зарчмаараа чуулганы ажил үргэлжилнэ хэмээн тэмдэглэлээ.
Тэрбээр, "Анхдугаар чуулганы эхэнд таван чиглэлээр ажлын баг байгуулж ажиллахаа мэдэгдсэн. Тодруулбал, УИХ-аас эдийн засгаа тогтворжуулах реформ хийж, хөдөө аж ахуйн үйлдвэрлэлээ дэмжих, УИХ-ын Ёс зүйн дэд хороог байнгын хороо болгох, хянан шалгах дэд хороог байгуулах, нийгмийн хамгааллын чиглэлээр хэрэгжүүлэх ажлыг идэвхжүүлэх зэргээр ажлын баг байгуулж ойрын хугацаанд ажлаа эхлүүлнэ. Анхдугаар чуулган завсарласан ч ээлжит бус чуулганыг удахгүй зарлан хуралдуулна. Ингэхдээ, Зээлийн хүүг багасгах, банк санхүүгийн байгууллагын шинэчлэлийг хийхээс гадна төсвөө тодотгоно. УИХ-ын чуулганы завсарлагааны үед УИХ-ын гишүүд тойрогтоо ажиллаж иргэд сонгогчдын санал хүсэлтийг сонсох юм. УИХ-ын анхдугаар чуулганаар гурван байнгын хороо шинээр байгууллаа. Ингэснээр, зардал нэмэхгүй, ёс зүй, сахилга хариуцлага дээшилж, цахим засаглалын эрх зүйн орчин нэмэгдэж, төсөвт хэмнэлтийн шинэчлэл болно" хэмээв.