Өнөөдөр гадаа -12 градусын хүйтэн байна. Таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй
1 дүгээр сарын 17-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 17 дахь өдөр бөгөөд он дуусахад 348 хоног үлдлээ.
- Цаг агаар өдөртөө -12 хэмийн хүйтэн бол шөнөдөө -23 градус хүйтэн байх нь ээ.
- Билгийн тооллын 11, хоёр хар мэнгэтэй хөх бар өдөр. Өнөөдөр үсээ авахуулах буюу засуулбал эрч хүч ихсэх гэнэ. Энэ өдөр морь жилтнээ аливаа үйлийг хийхэд эерэг сайн, үхэр, луу, хонь, нохой жилтнээ сөрөг муу нөлөөтэй тул аливаа үйлийг хийхдээ анхаарал болгоомжтой байхыг од эрхэс сануулж байна.
- Манай улсын голлох валют болох ам.долларын ханш 2658.00 төгрөгтэй тэнцэж байгаа бол бусад валют болох рубль 40.00, юань 392.70, вон 2.37 төгрөг байна.
Өнөөдөр болох онцлох үйл явдлууд:
- Блю Скай зочид буудалд “МОНГОЛ УЛСЫН ЖИЖИГ, ДУНД БИЗНЕСИЙН ХӨГЖЛИЙН ӨНГӨРСӨН, ОДОО, ИРЭЭДҮЙ: ЗӨВЛӨХ ҮЙЛЧИЛГЭЭНИЙ ҮНЭ ЦЭН” сэдэвт зөвлөлдөх уулзалтыг зохион байгуулна.
- Мэргэшсэн нягтлан бодогчдын “Жилийн уулзалт-2019” буюу нэгдсэн хурал 14.00 цагт Grand hill зочид буудлын 17 давхрын хурлын танхимд “Эдийн засгийн өнөө ба ирээдүй” сэдвийн хүрээнд болно.
- Үндэсний мэдээллийн төвд 11.00 цагаас АНУ-д H2 ажлын визээр ажиллах сонирхолтой хүмүүст бодит мэдээлэл өгөх, мөн тус улсын мал аж ахуйн салбарт монголчуудыг ажиллуулах сонирхол өндөр байгаа талаар “Адис” нийгмийн хөгжлийн төвөөс мэдээлэл хийнэ.
- МУБИС, МУИС, Боловсролын Хүрээлэн, БМДИ, Боловсролын Үнэлгээний Төв хамтран зохион байгуулдаг Эрдэм шинжилгээний уламжлалт тав дахь хурал МУБИС-ийн байранд 09.00 цагт эхэлнэ.
- ХБНГУ-ын Дойче Велле академи, Хэвлэлийн Хүрээлэнгээс хамтран хэрэгжүүлэх дата буюу нээлттэй өгөгдлийн хэрэглээг дэмжих, дата сэтгүүл зүйн чиглэлээр ажиллах сэтгүүлчдийг чадавхжуулах төслийн нээлт, эхний хэлэлцүүлэг 10.00 цагт Монголын Хэвлэлийн Хүрээлэнд болно.
Энэ өдөр дэлхийн түүхэнд:
- 2010 онд Нигерийн Жос хотод Ислам болон Христийн шашинтнуудын хооронд мөргөлдөөн болж 200 хүн амь насаа алдав.
- 1998 онд Левинскийн дуулиан: АНУ-ын ерөнхийлөгч Билл Клинтон болон "Цагаан ордон"-д дадлага хийж байсан Моника Левински нарын нууц харилцааны талаар тусгай сурвалжлага, нийтлэл "Драдж Репорт" цахим хуудсанд анх тавигджээ.
- 1996 онд Тусгаар тогтносон Чех улс Европын холбоонд элсэх өргөдлөө өгчээ.
- 1992 онд Өмнөд Солонгост албан ёсны айлчлал хийсэн Японы ерөнхий сайд Миязава Ки-Ичи дэлхийн II дайны үеэр Солонгосын эмэгтэйчүүдийг бэлгийн мөлжлөгт ашигладаг байсан явдалд албан ёсоор уучлал гуйв.
- 1991 онд Персийн булангын дайн: Холбоотны нэгдсэн хүчнүүд Ирак улсад "Цөлийн шуурга" ажиллагааг эхлүүлэв. Кувейтыг эзлэн түрэмгийлсэн Ирак улсад НҮБ-ын аюулгүйн зөвлөл хугацаа өгсөн ч хугацаандаа хариу өгөөгүй тул ийнхүү цэргийн ажиллагаа эхэлжээ.
- 1961 онд АНУ-ын ерөнхийлөгч Дуайт Д.Айзенхаувер албан тушаалаа өгөхөөс гурван хоногийн өмнө ард түмэндээ хандаж үг хэлэв.
- 1950 онд Бостон хотын автомашины компанид зэвсэглэсэн 11 этгээд халдаж, 2 сая ам.долларыг хулгайлжээ.
