Өнөөдрийн тухай таны мэдэх ёстой 18 зүйл: Уушги тоосжих өвчнийг оношлох төхөөрөмжийг бэлэглэнэ

Өнөөдөр гадаа -9 градусын хүйтэн байна. Таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй

1 дүгээр сарын 11-ний өдөр

Өглөөд заавал мэдэж байх ёстой зүйлүүд:

1. Өнөөдөр бол жилийн 11 дахь өдөр бөгөөд он дуусахад 354 хоног үлдлээ.
2. Цаг агаар өдөртөө -9 хэмийн хүйтэн бол шөнөдөө -20 градус хүйтэн байх нь ээ. 
3. Билгийн тооллын 5, найман цагаан мэнгэтэй шар бич өдөр. Өнөөдөр үсээ авахуулах буюу засуулбал эд мал арвижих гэнэ. Энэ өдөр хулгана, луу жилтнээ аливаа үйлийг хийхэд эерэг сайн, бар, туулай жилтнээ сөрөг муу нөлөөтэй тул аливаа үйлийг хийхдээ анхаарал болгоомжтой байхыг од эрхэс сануулж байна.
4. Манай улсын голлох валют болох ам.долларын ханш 2675.00 төгрөгтэй тэнцэж байгаа бол бусад валют болох рубль 40.50, юань 395.00, вон 2.38 төгрөг байна.

Өнөөдөр болох онцлох үйл явдлууд: 

1. Монгол Улсын Ерөнхийлөгч Х.Баттулга Хөдөө Аж Ахуйн Их Сургуульд “Хөдөлмөрийн гавъяаны улаан тугийн одон” гардуулах ёслол ХААИС-ийн төв байрны “Хатан туул” театрт 10.30 цагт болно.
2. ШУА-ийн ерөнхийлөгч Д.Рэгдэл Төрийн шагнал хүртсэн болон гадаадын Шинжлэх ухааны салбарын томоохон шагналуудыг хүртсэн эрдэмтдээ 11.00 цагаас хүлээн авч хүндэтгэл үзүүлэх юм
   
3. 10.00 цагаас нийслэлийн ИТХ-ын Тэргүүлэгчдийн хуралдаан болно. Энэ удаагийн хуралдаанаар Аюултай хог хаягдлын төвлөрсөн байгууламж барих газрыг улсын тусгай хэрэгцээнд авах тухай, Багахангай дүүргийн “Хөнгөн үйлдвэрийн үйлдвэр технологийн парк”-ийн техник эдийн засгийн үндэслэл батлах тухай болон бусад асуудлыг хэлэлцэнэ. 
   
4. 11.30 цагаас нийслэлийн Хэвлэл мэдээллийн төвд "МОНГОЛЫН МИСТЕР 2019" УАШТ-нийг зохион байгуулах гэж байгаа талаар мэдээлнэ.
   
5. 15.00 цагт нийслэлийн Иргэний танхимд Сүхбаатар дүүрэг дэх Цагдаагийн 1 дүгээр хэлтсийн 2018 оны үйл ажиллагааны тайлангийн хурал болно.
   
6. "РЕАЛТОРУУДЫН ФОРУМ 2019" Төрийн ордны "В" танхимд зохион байгуулагдана.
   
7. 11.00 цагт Эмгэг судлалын үндэсний төвд УУШГИ ТООСЖИХ ӨВЧИН БА АСБЕСТЫН ШАЛТГААНТ АМЬСГАЛЫН ЗАМЫН ӨВЧНИЙ ЭРТ ҮЕИЙН ОНОШИЛГООНЫ ЧАДАМЖИЙГ САЙЖРУУЛАХ” төслийн хүрээнд NanoZoomer-SQ зайн оношилгооны төхөөрөмжийг гардуулж өгөх үйл ажиллагаа болно. 
   

Энэ өдөр дэлхийн түүхэнд: 

1. 1972 онд Зүүн Пакистан нэрээ Бангладеш болгон өөрчилж, тусгаар тогтнолоо зарлав.
   
2. 1957 онд Сенегалын нийслэл Дакар хотноо Африкийн зөвлөл байгуулагдав.
   
3. 1943 онд Дэлхийн хоёрдугаар дайн: АНУ болон Их Британийн арми Хятад улсад газар нутгийн эрхийг нь буцаан олгов.
   
4. 1942 онд Дэлхийн хоёрдугаар дайн: Япончууд Куала-Лумпурыг эзлэн авсан.
   
5. 1935 онд Амелиа Эрхарт Калифорни мужаас Хавай хүртэл нисч хүрсэн анхны хүн болов.
   
6. 1922 онд Дэлхийн эрүүл мэндийн практикт анх удаагаа чихрийн шижнээр өвчилсөн хүнд инсулинийг ашиглаж эхлэв.
   
7. 1908 онд АНУ Их хавцлыг үндэсний дархан цаазат газарт бүртгэн, аялал жуулчлалыг хөгжүүлэн, дурсгалын цогцолбор байгуулах шийдвэр гаргав.