“Монгол газар” компанийн захирал Ц.Мянганбаярт холбогдох хэргийг Дүүргийн эрүүгийн хэргийн анхан шатны II шүүхэд хэлэлцэн түүнийг хууль бусаар ашигт малтмал олборлосон гэм буруутайд тооцлоо. Ц.Мянганбаяр нарын 15 хүнийг Өвөрхангай аймгийн Уянга сумын нутагт хууль бусаар ашигт малтмал олборлосноос болж онц их хэмжээний хохирол учруулсан хэрэгт холбогдуулан Зохион байгуулалттай гэмт хэрэгтэй тэмцэх газрын Байгаль хамгаалах журмын эсрэг гэмт хэрэг мөрдөх хэлтсээс эрүүгийн хэрэг үүсгэн шалгасан юм. Тодруулбал, тус сумын Бөөрөлж үүтийн голд “Дөлгөөн цайдам”, “Өгөөж өлт”, “Шинэ Уянга”, “Шаазгай бадмаараг”, “Пүрэвдаш”, “Эдоц”, “Соёл арвижих”, “Шар зүлэг”, “Зул мөнх бадмаараг”, “Хаан соёолж” зэрэг компанийнхан нөхөн сэргээлт хийх нэрээр алт олборлож байсан аж. Ингэхдээ тэд “Монгол газар”, “Баярсгоулд” компанийн захирал Ц.Мянганбаяртай алт олборлосон хуучин газрыг нөхөн сэргээх гэрээ байгуулжээ.
Уг нь 2009 онд тухайн газрыг нь “Монгол газар”-ын эзэмшлээс хасаж, орон нутгийн мэдэлд өгч нөхөн сэргээчихсэн, сэргээх ажил дахин хийх шаардлагагүй, байгалийн төрхөндөө орж, эдгэрч байсан талбай аж. Гэвч дээрх нэр бүхий компанийн эзэд Ц.Мянганбаяртай хууль бус гэрээ байгуулж, шүүхийн захирамж, шийдвэрийг үл ойшоожээ. Энэ хэрэгт Уянга сумын Засаг дарга П.Баатар, ЗДТГын дарга З.Дагвасүрэн, VI багийн Засаг дарга Г.Цэрэнчимэд, Сумын Иргэдийн нийтийн хурлын дарга Ж.Шийрэвдорж, Төрийн банкны төлөөлөгч Д.Минжбадгар нарын 15 хүн холбогдсон бөгөөд Ц.Мянганбаяртай хамт яллах дүгнэлт үйлдүүлэхээр долоон хүнийг прокурорын байгууллагад шилжүүлсэн.
Харин Дүүргийн II прокурорын газраас зөвхөн Ц.Мянганбаярт яллах дүгнэлт үйлдэж бусдынх нь хэргийг хэрэгсэхгүй болгосон юм. Дүүргийн эрүүгийн хэргийн анхан шатны II шүүхээс Ц.Мянганбаярыг улсад 190 орчим сая төгрөгийн хохирол учруулсан нь тогтоогдсон, анх удаа гэмт хэрэг үйлдсэн, улсад учруулсан хохирлоо төлсөн зэргийг нь харгалзан хөдөлмөрийн хөлсний доод хэмжээг 100 дахин буюу 19.2 сая төгрөгөөр торгох ял ногдуулжээ.
