Монголын хип хоп урлагт 20 жилийн турш өөрийн өнгө төрх, үзэл бодлыг илэрхийлж буй уран бүтээлч ЦэЦэ буюу Н.Цэцэнбилэг өөрийн бие даасан тоглолтоо 2024 оны есдүгээр сарын 7-ны өдөр хийж, шүтэн бишрэгчдэдээ бэлэг барихаар болжээ.
Төв цэнгэлдэх хүрээлэнд зохиогдох тус тоглолтыг “Хуур хөгжим наадам” ТББ зохион байгуулж байгаа бөгөөд тэд өөрсдийн гэсэн өнгө төрх, тайз дэлгэц, зохион байгуулалтаараа бусдаас ялгарч чаддаг юм.
Тэгвэл өнөөдөр XMF 2024 “Tsetse vs Bilgee” тоглолтын хэвлэлийн хурал боллоо. Тоглолт болох өдөр хаалга 14.00 цагт нээгдэх ба тоглолтын хөтөлбөр 16.00 цагт эхлэх юм байна. Tsetse 20.30 цагт уран бүтээлээ толилуулах ба бие даасан болон дуэт нийтдээ 37 дуу дуулах юм байна. Мөн 25 зочин уран бүтээлч оролцохоор болсон байна.
Тасалбарын хувьд энгийн нь 69 мянга, VIP тасалбар 550 мянга, fan zone буюу ойроос үзэх боломж бүхий тасалбар 109 мянган төгрөгийн үнэтэй байна.
Тоглолтын талаар XMF буюу "Хуур" хөгжмийн наадмын ерөнхий найруулагч Ж.Энхжаргалан хэлэхдээ “Ариун цэвэр, харуул хамгаалалт, дуугаралтад онцгойлон анхаарч байгаа. Энэ жилийн хамгийн чанартай тоглолтыг зохион байгуулах болно. Тайз дэлгэцийн хувьд дүрсний өндөр чанартай лед дэлгэцээр хамгийн чанартай тоглолтыг үзүүлэх ба дуугаралтын хувьд Clair Brothers брэндийн хөгжмийн системийг суурилуулж байгаа. Тоглолтыг хамгийн гол зүйл болох дуугаралт байдаг. Тиймээс хажуугаас сонсолттой, таныг тайзны хаана ч байсан жигд сонсохоор хамгийн сүүлийн дэвшилтэт технологийг ашиглаж байгаа.
Үүнээс гадна бид хамгийн сайн харуул хамгаалалтын газартай хамтарч ажиллаж, 200-гаад харуул хамгаалалтын ажилтан үзэгчдийн аюулгүй байдлыг анхаарч ажиллана” гэв.
