“Хурд” хамтлагийнхны бодит амьдралаас сэдэвлэсэн романтик уянгын уран сайхны кинонд тоглож, залуу насаа мөнхлөх боломж байна. Энэ бол “Хурд” хамтлагийнхны 31 жилийн ойгоо тохиолдуулан шүтэн бишрэгчдэдээ барьж буй гэнэтийн бэлэг юм. Тодорхой хэлбэл, уг романтик уянгын кинонд дүрүүдийг шүтэн бишрэгч дундаасаа сонгон шалгаруулж эхлэв. Эмэгтэй гол дүрд 28-38, эрэгтэй туслах дүрд 30-40 настай энгийн шаардлага тавьжээ. Мөн эмэгтэй гол дүрийн бага нас, нэгдүгээр туслах дүрүүд, олны хэсэг гэх мэтээр өөр олон дүр төрхийг “Хурд” хамтлагийнхан хайж, долдугаар сарын 1-ний 21.00 цаг хүртэл hurd.band@gmail.com хаягаар материал хүлээн авах нь. Улмаар шалгаруулалтаа долдугаар сарын 2-ны өдөр Хан-Уул дүүргийн Соёлын төв ордонд зохион байгуулах нь ээ.
Ташрамд дурдахад, “Хурд”-ынхан 2023 онд 30 жилийн ойгоороо Төв цэнгэлдэх хүрээлэнд хүндэтгэлийн тоглолтоо зохион байгуулж, шүтэн бишрэгчдийн хамт нижгэр тэмдэглэсэн. Тус хамтлагийн тоглолтод Монгол урдаа барьдаг шилдэг хамтлаг дуучид ая дуугаа өргөн, баяр хүргэсэн. Мөн Хүндэт харуулууд тайзнаа яралзтал жагсаж, ёсолсон аархал, авьяас, дуулиан дүүрэн тоглолт байсныг шүтэн бишрэгчид нь өнөөдөр ч ярьсаар байгаа юм.
