Реппер Big Gee бие даасан дөрөв дэх тоглолтоо хийхээр зарлаад байна. “The legacy” нэртэй уг тоглолт хэзээ, хаана, хэдэн цагт болох нь тодорхойгүй. Өөрөөр хэлбэл, товоо зарлаагүй ч тоглолтынхоо тасалбарыг хэдийн борлуулж эхлээд байгаа юм. “Тоглолт хэзээ, хаана болох нь тодорхойгүй ч түүнээс үл хамааран заавал зорин ирэх үнэнч дэмжигчдэдээ зориулсан хамгийн эхний, хамгийн хямд, цөөн тоогоор худалдах тасалбар юм” гэж уран бүтээлч тодотгожээ. Тасалбарынх нь үнэ 80 мянган төгрөг бөгөөд энэ сарыг дуустал борлуулах гэнэ.
Энэ зун Төв цэнгэлдэх хүрээлэнд олон уран бүтээлч тоглолтоо хийх төлөвтэй талаар бид өмнө нь мэдээлсэн. Тэдний нэг нь реппер Big Gee гэх сураг ажиг сонсогдож байв. Өөрөөр хэлбэл, энэ зун тэрбээр Төв цэнгэлдэх хүрээлэнд фэнүүдтэйгээ уулзаж магадгүй юм.
Бэлтгэсэн: М.Оч
