“Бээжин-2022” өвлийн олимпын наадмын цанын төрөлд уралдах Монголын багийн тамирчин, Цанын спортын олон улсын спортын мастер Батмөнхийн Ачбадрах нь 1994 онд төрсөн. Цанын спортын Улсын аварга шалгаруулах тэмцээний таван алт, хоёр мөнгө, гурван хүрэл медальтай. Мөн 2018 оны насанд хүрэгчдийн “Б” зэрэглэлийн Дэлхийн аварга шалгаруулах 10 километрийн зайн уралдаанд хүрэл медаль хүртсэн амжилттай залуу тамирчин юм.
Тэрбээр “Бээжин-2022” өвлийн олимпын наадмын эрх авахдаа 2021 оны ДАШТ-ий 10 км-ын зайд наймдугаар байр, FIS-ий олимпын оноо олгох тэмцээнд амжилттай оролцож, Монголын цанын спортын түүхэнд Дэлхийн цомд албан ёсоор оролцох эрх авчээ. Мөн “Алфен-2021” цомын аварга шалгаруулах тэмцээний 15 км-ын зайд Монголын цанын спортын түүхэнд хамгийн өндөр цагийн амжилт үзүүлсэн байна.
