Сэлэм барьж олон нийтийн газар танхайрсан бичлэг нь нэг хэсэг дуулиан тарьсан С.Бямбацогт нарт холбогдох хэргийг шүүх шийдвэрлэжээ. Нийслэлийн ИТХ-ын тэргүүлэгч С.Мөнхчулууны төрсөн дүү, ахынхаа үүсгэн байгуулсан “VIP security” хэмээх хамгаалалтын албыг удирддаг хэмээн тухайн үед хэвлэлд мэдээлж байсан тэрбээр 2018 онд болсон шүүх хурлын үеэр худал мэдүүлэг өгсөн учраас уг үйлдлийг нь нэгтгэн шалгуулахаар буцаасан байна. Тиймээс 2017 оны арваннэгдүгээр сард гарсан уг хэргийг энэ оны дөрөвдүгээр сард шүүх хэлэлцэн шийдвэрлэсэн аж. С.Бямбацогт, А.Одмөнх, Н.Мөнх-Учрал нарт холбогдох, сэлэм эргүүлж танхайрсан хэрэг чухам юунаас үүдэлтэйг уншигчид үүнээс ойлгох биз ээ. Дээрх гурван хүн өмнө нь эрүүгийн хэрэгт холбогдон, хоёр нь ял шийтгүүлж хорих ял эдэлж байжээ. Харин “Сэлэм” гэх хочтой болсон С.Бямбацогтын хувьд хууль бусаар мөрийтэй тоглосон хэрэгт холбогдон шалгуулж, гэм буруутайг нь шүүх тогтоосон ч хөнгөн гэмт хэрэг үйлдсэнээс хойш зургаан сарын хугацаа өнгөрсөн тул хариуцлагаас чөлөөлж байсан аж.
БУРУУТАЙ ХҮНЭЭ ОЛОЛГҮЙ СЭЛЭМ ЭРГҮҮЛЖЭЭ
Баянгол дүүргийн XII хорооны нутагт байрлах “Кастл” хэмээх шөнийн цэнгээний газрын гадаа 2017 оны арваннэгдүгээр сарын 12-ны үдэш хар жийпнээс буусан залуу сэлэм эргүүлж, тэр орчимд байсан олон хүнийг цавчих гэж айлгаж буй бичлэгийг уншигчид санаж буй. Чухам юунаас болж олныг хиртхийлгэсэн ийм явдал болсон бэ гэдгийг хэргийн холбогдогч нар дараах байдлаар тайлбарласан байх юм. С.Бямбацогт мэдүүлэгтээ “Би тухайн үед найз Н.Мөнх-Учралын хамт явж байсан юм. “Кастл” баарны хамгаалагч залуу гартаа хутга барьчихсан гарч ирж харагдсан. Уг хамгаалагч залууг хэн нэгнийг гэмтээчих болов уу гэж бодоод машинаас буухдаа тээшинд байсан сувинерэн сэлмийг аваад буусан. Гэхдээ би хэн нэгнийг уг сэлмээр цохьё, айлгаж сүрдүүлье гэж бодоогүй. “Кастл” баарны хэдэн хамгаалагч миний хамгаалалтыг нь хариуцдаг тоглоомын газарт тоглоод мөнгөө алдсан. Улмаар тус тоглоомын газрын юмыг эвдэж сүйтгээд явсан байсан тул би учир зүйгээ олох гэж тус баар луу очсон юм. “Кастл” баарны нэг хамгаалагч руу 2-3 удаа далайгаад “Чи яаж байгаа юм бэ” гэж би хэлсэн. Тэгэхэд тэр хүн “Би тийм зүйл хийгээгүй” гээд тоглоомын газрыг түйвээсэн хүмүүсийнхээ утасны дугаарыг өгсөн юм. Ингээд машиндаа суугаад явах гэж байтал тэр баарны хамгаалагч нар өөрсдөө хайч, хутга бариад гарч ирсэн тул би машины ард байсан тоглоомон сэлмийг аваад далайсан” гэжээ. Харин түүнтэй муудалцсан баарны хамгаалагч гэрчээр мэдүүлэг өгөхдөө “Тухайн үед гартаа хуванцар сэлэм барьсан гэдэг нь худлаа. Хэрэв хуванцар сэлэм барьсан байсан бол мэдэх байсан” хэмээсэн байв.
Харин А.Одмөнх “2017 оны арваннэгдүгээр сарын 12-ны 02.00 цагийн үед энэ үйл явдал болсон. Би тухайн үед Баянгол дүүргийн 17 дугаар хороонд байрлах нэг тоглоомын газарт ажилладаг байсан юм. Тоглоомын газраа хаагаад цаад өрөөнд байж байтал хаалга чанга балбаад байсан тул онгойлгоход С.Мөрөн, С.Бямбацогт нар зогсож байв. “Яагаад хаалга чанга цохиод байгаа юм бэ” гэхэд С.Мөрөн цагаан хутга гаргаж ирээд над руу дайрсан. Би “юу болж байна” гэтэл С.Мөрөн хутгаа буцаагаад далд хийсэн. Тэгээд намайг буцаад ороход араас боогоод унагаад яваад өгсөн. Би Б.Элбэгсайхан, Г.Ганхуяг нар луу утасдаад “Та нартай гэмгүй сайхан байдаг хүмүүс хүрч ирээд н.Сайханаа бид хоёрыг дээрэлхээд явлаа” гэлээ. Удалгүй Б.Элбэгсайхан, Г.Ганхуяг, Ц.Амарзаяа, Г.Энхжин нар ирээд С.Бямбацогт руу Б.Элбэгсайхан утсаар ярьсан. Тэгээд Богдхан уулын Залаатын ам руу явцгаалаа. Очоод Б.Элбэгсайхан, С.Бямбацогт нар хоорондоо муудалцсан. Би араас нь очоод С.Бямбацогттой муудалцаж нэг нэгнийгээ цохисон. Гэтэл С.Бямбацогт “Чи намайг хутгалчихлаа” гэхээр нь би “Үгүй ээ, чи намайг хутгалчихлаа” хэмээсэн. С.Бямбацогт бид хоёрын гар хоёулаа зүсэгдсэн болохоор би тухайн үед зодолдож байхдаа намайг хатгачихлаа гэж бодсон” гэсэн мэдүүлэг өгсөн байна.
Автомат тоглоомын газар ажиллуулж байгаад хүмүүст эд хөрөнгөө эвдүүлсэн Д.Зулхүү мэдүүлэгтээ “Бид “Кастл” баарны гадаа очоод манай тоглоомын газар ирсэн хүмүүс бий, эсэхийг харсан боловч байгаагүй. Тэгээд би хамгаалагч нараас нь “Манайд ирж агсам тавьсан хүмүүс чинь хаана байна” гэхэд нэг хамгаалагч залуу “Юу хуцаад байгаа юм” гэсэн. Тэгээд сүртэй юм болоогүй, бид машиндаа суугаад явах гэтэл баарны үүдэнд байсан С.Мөрөн “хөөш” гээд орилохоор нь хартал баарны нэг хамгаалагч хайч барьчихсан, ахиад нэг нь хутга бариад зогсож байсан. Тэгээд бид машинаасаа бууж баарны үүдэнд очоод барьцалдаж аваад маргалдаж байхад С.Бямбацогт гартаа сэлэм барьчихсан зогсож байсан” гэжээ.
С.БЯМБАЦОГТ НАЙЗТАЙГАА ХАР ТАМХИ ХЭРЭГЛЭСНИЙГ ШИНЖЭЭЧИД БАТЛАВ
Прокуророос С.Бямбацогт, Н.Мөнх-Учрал нарыг буруутгасан гол үндэслэл нь мансууруулах бодис хууль бусаар хадгалсан, хэрэглэсэн гэх үйлдэл байв. Тодруулбал, 2017 оны арваннэгдүгээр сарын 14-нд Баянзүрх дүүргийн нутаг, “Sunshine” хотхоны 332 дугаар байрны 201 тоотод метамфетамины агууламж бүхий мансууруулах бодис хадгалсан хэрэгт тэд холбогдсон юм. Өөрөөр хэлбэл, сэлэм эргүүлэн, зэвсгийн чанартай зүйл хэрэглэн нийтийн хэв журмыг зөрчиж, бусдад хүч хэрэглэн эд хөрөнгө гэмтээж, аж ахуйн нэгж, байгууллагын хэвийн үйл ажиллагаа, олон нийтийн амгалан тайван байдал алдагдуулсан хэрэг өдүүлснээсээ хойш хоёр хоногийн дараа хар тамхины хэрэгт холбогдсон байна. Энэ тухайгаа С.Бямбацогт ярихдаа “Sunshine” хотхоны 332 дугаар байрны 201 тоотод миний найз Н.Мөнх-Учрал нэг хэсэг амьдарч байсан. Тэр үедээ С.Мөрөн гэх залуутай хамт байсан юм билээ. Н.Мөнх-Учралтай хамт амьдарч байсан С.Мөрөнг мансууруулах бодис хэрэглэсэн байхад нь цагдаа нар ирсэн. Цагдаа нар эхлээд надтай хамт миний ажлын өрөө, машин болон гэрт үзлэг хийхэд мансууруулах бодис гарч ирээгүй. Тэгээд “Sunshine” хотхонд чиний байр байдаг уу” гэж асуухад нь би “Тийм ээ, тэнд миний найз амьдардаг, шаардлагатай бол очиж үзэж болно” гэж хэлээд түлхүүрээ авч цагдаа нарын хамт “Sunshine” хотхонд байрлах байрандаа очсон. Гэтэл тэнд эд мөрийн баримтаар хураагдсан эд зүйлс байсан. Эдгээр зүйлс нь Н.Мөнх-Учрал бид хоёрынх биш. Ийм зүйлс гарч ирсэнд гайхаж байна” гэжээ. Харин Н.Мөнх-Учрал нь “Би тухайн үед тэнд амьдарч байсан ч намайг байхгүй хооронд ийм хэрэг болсон. Тухайн үед манай байранд С.Мөрөн гэх залуу түр амьдарсан. Би эхнэр, хүүхэдтэйгээ эвлэрээд, хувцсаа авах гэж ирэхэд С.Мөрөнтэй хамт урдаас ирсэн гэх, шивээс бүхий хоёр дүү нь сууж байв. Тэгэхэд ширээн дээр тамхи шиг, одоо энэ хэргийн эд мөрийн баримтаар хураагдсан тамхи гээд байгаа зүйл байсан” гэсэн мэдүүлэг өгчээ.
Харин ШШҮХ-гийн шинжээчид С.Бямбацогт, Н.Мөнх-Учрал нарын шээсэнд шинжилгээ хийгээд “Шинжилгээнд ирүүлсэн “С.Бямбацогт 2017.11.14” гэж хаягласан шээсэнд метамфетамины агууламж илэрсэн. Метамфетамин НҮБ-ын сэтгэцэд нөлөөт бодисын 1971 оны жагсаалтад багтдаг” гэсэн дүгнэлт гаргасан байна. Мөн “Н.Мөнх-Учрал 2017.12.11 15.50” гэсэн хаягтай шээснээс метамфетамин илэрч байна” гэж дүгнэсэн байх юм.
ХЭРЭГ ХЯНАН ШИЙДВЭРЛЭХ АЖИЛЛАГААНД САНААТАЙ ХАЛДСАН ГЭЖ ҮЗЛЭЭ
С.Бямбацогт, Н.Мөнх-Учрал, А.Одмөнх тэргүүтэй хүмүүс 2017 оны арваннэгдүгээр сарын 12-нд “Кастл” баарны гадаа эхэлсэн зодооноо Баянзүрх дүүргийн нутагт үйл ажиллагаа явуулдаг “Ривер бийч” амралтын газрын орчимд үргэлжлүүлсэн байдаг. Улмаар С.Бямбацогт, Н.Мөнх-Учрал нар эрүүл мэндээрээ хохирсон талаар тухайн үед хэвлэлд мэдээлж байв. Тэгвэл НПГ-аас уг хэргийг хэрэгсэхгүй болгосон аж. 2019 оны арваннэгдүгээр сарын 8-нд тус газрын хяналтын прокурор “Зарим яллагдагч нарт холбогдох хэргийг хэрэгсэхгүй болгох тухай” тогтоол гаргаж яллагдагч А.Одмөнх, Г.Ганхуяг, Ц.Ган-Эрдэнэ, Б.Элбэгсайхан нарт холбогдох, “Ривер бийч” амралтын газрын өмнөх замд нийтийн хэв журмыг бүлэглэн, зэвсэг, зэвсгийн чанартай зүйл хэрэглэн зөрчиж, бусдад хүч хэрэглэн А.Одмөнх нь С.Бямбацогтод хөнгөн, Ц.Ган-Эрдэнэ нь С.Мөрөнд хөнгөн, Г.Ганхуяг нь Н.Мөнх-Учралын эрүүл мэндэд хөнгөн хохирол учруулж, олон нийтийн амгалан тайван байдал алдагдуулсан гэх хэргийг Эрүүгийн хэрэг хянан шийдвэрлэх тухай хуулийн 32.5-1.1 дэх хэсэгт заасан “гэмт хэргийн шинжгүй” үндэслэлээр хэрэгсэхгүй болгосон байна.
Уг нь тэдэнд холбогдох хэргийг Баянзүрх дүүргийн Эрүүгийн хэргийн анхан шатны шүүх 2019 оны тавдугаар сарын 9-нд хэлэлцсэн юм. Тэгэхэд С.Бямбацогт, Н.Мөнх-Учрал, А.Одмөнх нар худал мэдүүлэг өгчээ. Тухайлбал, С.Бямбацогт шүүхийн хэлэлцүүлгийн үеэр хохирогчоор мэдүүлэг өгөхдөө “А.Одмөнх над руу дайрсан. Гарт нь ямар нэг зүйл байгаагүй. Бид хоёр цохилцоод салсан. С.Мөрөн, Н.Мөнх-Учрал нар “Чиний гарыг А.Одмөнх цохисон гэсэн. Би согтуу байсан болохоор хэн надад гэмтэл учруулсныг мэдэхгүй. С.Мөрөн хутгатай гарч ирсэн. Сүүлд С.Мөрөнгийн хутгыг А.Одмөнх барьсан байсан. Тэгээд би А.Одмөнх намайг гэмтээсэн гэж бодсон” хэмээсэн нь худлаа болж таарсан байна.
Харин А.Одмөнх мөрдөн шалгах ажиллагааны явцад хохирогчоор мэдүүлэг өгөхдөө “Намайг газар унангуут С.Бямбацогт миний толгой руу өшиглөсөн. Би хоёр гарынхаа шуугаар хааж байсан. Тэгтэл энд тэндээс миний биеийн бүх хэсэг рүү хэд хэдэн удаа өшиглөсөн. “Ривер бийч”-ийн гадаа очиход машинаас С.Мөрөн гартаа хутга барин буугаад Г.Ганхуяг руу дайраад байсан. Бид ч буухтай зэрэгцээд С.Бямбацогт , Н.Мөнх-Учрал нар машинаасаа бууж ирсэн. Тэр үед С.Бямбацогт гартаа сэлэм бариад над руу дайрсан. Сэлмээ далайгаад над руу дайрахаар нь би зүүн гараараа хаасан. Тэгтэл шууг минь зүсчихсэн” гэсэн мэдүүлэг өгсөн аж. Харин шүүхийн хэлэлцүүлэгт А.Одмөнх мэдүүлэхдээ “Тэр өдөр С.Бямбацогт хутга, шөвөг барьж дайраагүй. Тэр өдөр хутгатай байсан ганц хүн нь С.Мөрөн. Бид муудалцаад салахад миний гар хутгалагдсан байсан. Тухайн үед С.Бямбацогт намайг хутгалсан гэж байсан болохоор би тэгж мэдүүлэг өгсөн. Надад хутга байгаагүй” хэмээсэн нь зөрүүтэй учраас шүүхэд худал мэдүүлэг өгсөн гэж үзжээ. Тодруулбал, С.Бямбацогт, Н.Мөнх-Учрал, А.Одмөнх нар шүүх хуралд хохирогчоор зориуд худал мэдүүлэг өгсөн үйлдэл нь хэрэг хянан шийдвэрлэх хэвийн үйл ажиллагаа, хүний эрх, ашиг сонирхолд гэм буруугийн санаатай хэлбэрээр халдсан, Эрүүгийн хуулийн 21.2-т хуульчлан тодорхойлж, эрүүгийн хариуцлага хүлээлгэхээр заасан гэм буруутай үйлдэл хэмээн шүүх бүрэлдэхүүн дүгнэсэн байна.
Ингээд С.Бямбацогт, Н.Мөнх-Учрал нарыг бүлэглэн мансууруулах эм, сэтгэцэд нөлөөт бодисыг худалдах зорилгогүйгээр хууль бусаар хадгалсан, нийтийн хэв журмыг бүлэглэн зэвсэг, зэвсгийн чанартай зүйл хэрэглэн зөрчиж, бусдад хүч хэрэглэн, эд хөрөнгө гэмтээж, аж ахуйн нэгж, байгууллагын хэвийн үйл ажиллагаа, олон нийтийн амгалан тайван байдлыг алдагдуулсан гэм буруутайд тооцож, хар тамхи хадгалсанд нь нэг, нөгөө үйлдэлд нь хоёр жил хорих ял оноохоор болжээ. Мөн С.Бямбацогт, Н.Мөнх-Учрал, А.Одмөнх нарыг хохирогч шүүхэд үнэн, зөв мэдүүлэг өгөхөө илэрхийлж баталгаа гаргасны дараа зориуд худал мэдүүлэг өгсөн гэм буруутайд тооцож 450 мянган төгрөгөөр торгохоор шийдвэрлэсэн аж.
Улмаар С.Бямбацогт, Н.Мөнх-Учрал нарт торгох ялын 15 нэгжтэй тэнцэх хэмжээний төгрөгийг хорих ялын нэг хоногтой дүйцүүлэн тооцож 30 хоногийн хугацаагаар хорихоор болжээ. Ингээд дээрх хоёр хүний шийтгэлийг нэмж нэгтгэн биечлэн эдлэх ялын хугацааг гурван жил 30 хоногийн хугацаагаар тогтоож, нээлттэй хорих ангид эдлүүлэхээр шийдвэрлэсэн байна. Анхан шатны шүүхийн эл тогтоолыг дээрх гурван шүүгдэгч, тэдний өмгөөлөгч нар эсэргүүцэж, нийслэлийн Эрүүгийн хэргийн давж заалдах шатны шүүхэд гомдлоо хүргүүлээд буй гэнэ.
Бэлтгэсэн: Г.Равжаа
