Өнөөдөр гадаа -9 градусын хүйтэн байна. Таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй
11 дүгээр сарын 28-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 332 дахь өдөр бөгөөд он дуусахад 33 хоног үлдлээ.
- Цаг агаар өдөртөө -9 хэмийн хүйтэн бол шөнөдөө -19 градус хүйтэн байх нь ээ. Бага зэргийн цас орох гэнэ.
- Билгийн тооллын 20, найман цагаан мэнгэтэй харагчин гахай өдөр. Өнөөдөр үсээ авахуулах буюу засуулбал өлсөж ундаасах гэнэ. Энэ өдөр хонь, туулай жилтнээ аливаа үйлийг хийхэд эерэг сайн, бич, тахиа жилтнээ сөрөг муу нөлөөтэй тул аливаа үйлийг хийхдээ анхаарал болгоомжтой байхыг од эрхэс сануулж байна.
- Манай улсын голлох валют болох ам.долларын ханш 2602.00 төгрөгтэй тэнцэж байгаа бол бусад валют болох рубль 39.80, юань 376.50, вон 2.28 төгрөг байна.
Өнөөдөр болох онцлох үйл явдлууд:
- MN-Мэдээллийн төвд 11.00 цагаас Тавантолгойд нүүрс тээвэрлэгч жолооч нарын гэр бүлийнхэн, Монголын эрчүүдийн хөгжлийн нийгэмлэг хамтран хэвлэлийн бага хурал зарлалаа.
- MN-Мэдээллийн төвд 12.00 цагаас “ОДОНГОО” салоны 20 жилийн ойн баярын хүрээнд Монголын рок поп урлагийн бүх одод, Монголын тэргүүлэх зэргийн үсчдийн давтагдашгүй үзүүлбэр нэгэн тайзаа тоглогдох талаар мэдээлэл хийнэ.
- MN-Мэдээллийн төвд 13.00 цагаас “Монгол Улсад Хүний нөөцийн менежментийн стандартыг нэвтрүүлэх нь” форумын талаар мэдээлэл хийнэ. Хүний нөөцийн менежментийн тогтолцооны Олон улсын багц стандартыг үндэсний стандартаар батлуулах, Монголд нутагшуулах, хүний нөөцийн олон улсын анхны бүртгэгдсэн, баталгаажсан аудитор, зөвлөх, сургагч багш нарыг бэлтгэх төслийг “Монос” групп санаачилсан бөгөөд НХХЯ, Стандарт хэмжилзүйн газар, салбарын судлаач эрдэмтэн докторууд, Олон улсын стандартын академи, “Монголын менежментийн зөвлөхүүдийн холбоо” ТББ, “Монос” групп, “Монсертф” ХХК-ийн төлөөлөл бүхий ажлын хэсэг уг төсөл дээр ажиллаж байгаа аж.
- Жендэрт суурилсан хүчирхийллээс урьдчилан сэргийлэх, мэдлэг, мэдээлэл олгох зорилготой ЗАЛУУЧУУДАД зориулсан анхны "ЭЕРЭГ ЦЭНЭГ" манга зурагт номны нээлт 11.00 цагаас HUB INNOVATION CENTER-т болно.
- 14.00 цагт Төрийн ордны иргэний танхимд 94 уртын дууч, 9 морин хуурч "Уяхан замбуу тивийн наран, Энх мэндийн баяр" зэрэг 10 уртын дуу дуулна.
- Хууль зүй, дотоод хэргийн яам, Швейцарын хөгжлийн агентлагийн хамтарсан "Иргэдийн оролцоо II" төсөл 3 сум, 2 дүүрэгт иргэдийн бүлэг байгуулан ажиллаж, 09.00-17.00 цагийн хооронд тайлангийн танилцуулгаа Туушин зочид буудлын 5 давхарт Соёмбо танхимд зохион байгуулна.
- 11.00 цагаас Хэвлэлийн хүрээлэнд Нийгмийн эрүүл мэндийн үндэсний хүрээлэнгээс утаанд бага насны хүүхэд илүү өргөмтгий байгаа талаар тоо баримттай мэдээлэл хийж, иргэд, хувийн хэвшлийнхэн хамтарч агаарын бохирдлын хор нөлөөг багасгах алхам хийж буй талаар мэдээлнэ.
Энэ өдөр дэлхийн түүхэнд:
- 1992 оны энэ өдөр Exo хамтлагийн гишүүн Чанёл (Пак Чан-Ёл) мэндэлжээ.
- Өнөөдөр Испани улсад Багш нарын баярын өдөр тохиож байна.
- 1971 оны энэ өдөр Америкийн мэргэжлийн сагсан бөмбөгийн (NBA) тамирчин, дасгалжуулагч Nick Van Exel мэндэлжээ.
- 1992 онд Венесуэлд жилд хоёр дахь удаагаа цэргийн хүчнийхэн ерөнхийлөгч Carlos Andrйs Pйrez-г албан хүчээр огцруулах оролдлого хийжээ.
