Өнөөдөр гадаа 7 градусын дулаан байна. Таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй
10 дугаар сарын 23-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 296 дахь өдөр бөгөөд он дуусахад 69 хоног үлдлээ.
- Цаг агаар өдөртөө 7 хэмийн дулаан бол шөнөдөө -5 градус хүйтэн байх нь ээ.
- Билгийн тооллын 14, долоон улаан мэнгэтэй шар хулгана өдөр. Өнөөдөр үсээ авахуулах буюу засуулбал эд мал арвижих гэнэ. Энэ өдөр луу жилтнээ аливаа үйлийг хийхэд эерэг сайн, бич, тахиа жилтнээ сөрөг муу нөлөөтэй тул аливаа үйлийг хийхдээ анхаарал болгоомжтой байхыг од эрхэс сануулж байна.
- Манай улсын голлох валют болох ам.долларын ханш 2566.00 төгрөгтэй тэнцэж байгаа бол бусад валют болох рубль 39.30, юань 371.50, вон 2.27 төгрөг байна.
Өнөөдөр болох онцлох үйл явдлууд:
- 11.00 цагт ЭРДЭНЭС ТАВАН ТОЛГОЙ компанийн байранд иргэдийн 1072 хувьцааны луйврын талаар дэлгэрэнгүй мэдээллийг иргэний нийгмийн байгууллагууд хүргэж албан шаардлагыг Гүйцэтгэх захирал Б.Ганхуягт гардуулна.
- ХЗҮХ-ийн 304 тоот хурлын танхимд сургуулийн эцэг эх багшийн үндэсний нэгдсэн холбооны стратеги, баримт бичгийг хэлэлцэх анхдугаар чуулга уулзалтыг зохион байгуулна. Чуулганд 8 аймгийн 20 сумын 31 сургуулийн багш, эцэг эхийн төлөөллүүд ирж оролцоно.
- Бишрэлт зочид буудалд 14.00-17.00 цагийн хооронд хувийн хэвшлийн байгууллагуудад Монгол-Япон улсын Засгийн газрын хоорондын хоёр талт хамтын ажиллагааны хүрээнд хэрэгжиж байгаа нүүрстөрөгч багатай, байгаль орчинд ээлтэй техник технологийг нэвтрүүлэх замаар хүлэмжийн хийн ялгаралыг бууруулан кредит олгох механизмын санхүүжилтын хүрээнд төсөл хөтөлбөр хэрэгжүүлэх боломж, санхүүжилтийн төрлүүд сэдвээр дэлгэрэнгүй мэдээллийг өгөх семинарыг зохион байгуулна.
- 11.30 цагт Зууны мэдээ сонины мэдээллийн төвд Хөвсгөлийн уул уурхайд зориулагдсан төмөр замыг эсэргүүцэж хэвлэлийн бага хурал хийнэ.
- 09.00 цагт “Бизнесийн зөвлөх үйлчилгээ” уулзалт, хэлэлцүүлэг ХХААХҮЯ-ны нэг давхарын хурлын танхимд эхэлнэ.
- Хөгжлийн бэрхшээлтэй хүмүүсийн хөдөлмөр эрхлэх боломжийг нэмэгдүүлэх нь” сэдэвт туршлага солилцох Үндэсний бага хурал 08.30-14.00 цагт “Blue Sky” зочид буудлын “Кристал” танхимд болно.
Энэ өдөр дэлхийн түүхэнд:
- Өнөөдөр Унгар улсад Үндэсний баярын өдөр тохиож байна.
- Мөн өнөөдөр Ливи улсын үндэсний чөлөөлөлтийн өдөр юм.
- 1993 оны энэ өдөр АНУ-ын жүжигчин Taylor Spreitler мэндэлжээ.
- Мөн 1987 оны энэ өдөр "Хааны нар" киногоороо алдаршсан БНСУ-ын алдарт жүжигчин Seo In-guk мэндэлжээ.
- 2011 онд Ливийн Үндэсний Шилжилтийн Зөвлөл Ливийн Иргэний дайн дууссан хэмээн зарлажээ.
- 2011 онд Турк улсын Ван мужид болсон 7.2 баллын хүчтэй газар хөдлөлтийн улмаас 582 хүн амь насаа алдаж, мянга гаруй хүн бэртэж гэмтэж байжээ.
