Өнөөдөр гадаа 14 градусын дулаан байна. Таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй
10 дугаар сарын 18-ны өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 291 дахь өдөр бөгөөд он дуусахад 74 хоног үлдлээ.
- Цаг агаар өдөртөө 14 хэмийн дулаан бол шөнөдөө 0 градус хүйтэн байх нь ээ.
- Билгийн тооллын 9, гурван хөх мэнгэтэй харагчин хонь өдөр. Өнөөдөр үсээ авахуулах буюу засуулбал өвчин өчүүхэн ирэх гэнэ. Энэ өдөр гахай, туулай жилтнээ аливаа үйлийг хийхэд эерэг сайн, үхэр, луу, хонь, нохой жилтнээ сөрөг муу нөлөөтэй тул аливаа үйлийг хийхдээ анхаарал болгоомжтой байхыг од эрхэс сануулж байна.
- Манай улсын голлох валют болох ам.долларын ханш 2468.00 төгрөгтэй тэнцэж байгаа бол бусад валют болох рубль 39.30, юань 372.50, вон 2.28 төгрөг байна.
Өнөөдөр болох онцлох үйл явдлууд:
- 10.00 цагт уран зургийн галлерейд "Дархлаажуулалтын 10 хоног"-ийн нээлт болно.
- MN-Мэдээллийн төвд 11.00 цагаас Иргэний хөдөлгөөнүүдээс “Эрдэнэс тавантолгой” компанийн хувь нийлүүлэгчдийн хурал хууль бус байсныг эсэргүүцэн хэвлэлийн бага хурал зарлалаа. Тэд уг асуудлаар төрийн гурван өндөрлөгт шаардлага хүргүүлэх аж.
- 15.00 цагт Уран зургийн галерейд "Өнөөдрийн Монгол" төслийн тайлант үзэсгэлэнг дэлгэнэ.
- Биеийн тамир, спортын улсын IV зөвлөгөөн 09.00 цагаас "Спорт ба хөгжил" сэдвийн хүрээнд, МУ-ын Ерөнхий сайд У.Хүрэлсүхийн ивээл дор болно.
- 11.00 цагт “Нийслэл, дүүргийн төсвийн болон орон нутгийн өмчит газруудын бүтэц, зохион байгуулалт, чиг үүргийн хэрэгжилт, үр дүн”-д хийсэн гүйцэтгэлийн аудитыг танилцуулах арга хэмжээ Нийслэл дэх Төрийн аудитын Газарт болно.
- 11.00 цагт "Монголын экспорт экспо-2018" нэгдсэн арга хэмжээний нээлт Мишээл экспо төвд болно.
- Санхүүгийн зохицуулах хороо, ХБНГУ-ын Олон Улсын хамтын ажиллагааны GIZ байгууллага, Азийн орнуудын хүртээмжтэй даатгалын асуудлаарх мэдлэг, туршлага солилцох сүлжээ хамтран 09.30-17.00 цагт “Хүртээмжтэй даатгалын тухай олон нийтийн мэдлэг ба гамшгийн эрсдэлийн удирдлага” сэдэвт семинарыг зохион байгуулна.
Энэ өдөр дэлхийн түүхэнд:
- Өнөөдөр Зангианы олон улсын өдөр тохиож байгаа юм байна.
- 1987 оны энэ өдөр High School Musical цуврал киногоороо алдаршсан алдарт жүжигчин Zac Efron мэндэлжээ.
- 1979 оны энэ өдөр Америк дуучин, ая зохиогч, продюсер Ne Yo мэндэлжээ.
- 1945 онд Аргентин улсын генерал, улс төрч, тус улсын Ерөнхийлөгчөөр 3 удаа сонгогдож байсан Juan Domingo Perуn жүжигчин Eva Perуn-тай хуримлажээ.
- 2004 онд Мьянмарын ерөнхий сайд Khin Nyunt авлигын хэргээр буруутгагдаж, Төрийн ордноос баривчлагджээ.
