Өнөөдрийн тухай таны мэдэх ёстой 16 зүйл: Дорноговь аймгийн 4000 иргэн аюултай хог хаягдлын дунд амьдарч байгаа талаараа мэдээлнэ

Өнөөдөр гадаа 2 градусын дулаан байна. Таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй

Аравдугаар сарын 08-ны өдөр

Өглөөд заавал мэдэж байх ёстой зүйлүүд:

1. Өнөөдөр бол жилийн 281 дахь өдөр бөгөөд он дуусахад 85 хоног үлдлээ.
2. Цаг агаар өдөртөө 2 хэмийн дулаан бол шөнөдөө -5 градус хүйтэн байх нь ээ.
3. Билгийн тооллын 29, дөрвөн ногоон мэнгэтэй харагчин тахиа өдөр. Өнөөдөр үсээ авахуулах буюу засуулбал сүлд тэнэж одох гэнэ. Энэ өдөр үхэр, могой жилтнээ аливаа үйлийг хийхэд эерэг сайн, бар, туулай жилтнээ сөрөг муу нөлөөтэй тул аливаа үйлийг хийхдээ анхаарал болгоомжтой байхыг од эрхэс сануулж байна
4. Манай улсын голлох валют болох ам.долларын ханш 2568.00 төгрөгтэй тэнцэж байгаа бол бусад валют болох рубль 39.10, юань 374.00, вон 2.26 төгрөг байна.

Өнөөдөр болох онцлох үйл явдлууд:

1. MN-Мэдээллийн төвд 11.00 цагаас Хууль сахиулахын их сургууль, Хил хамгаалах ерөнхий газар хамтран "Хилийн аюулгүй байдалд тулгамдаж буй асуудал, шийдвэрлэх арга зам" сэдэвт олон улсын эрдэм шинжилгээний хурлыг зохион байгуулахтай холбогдуулж мэдээлэл хийнэ.
2. Үндэсний мэдээллийн агентлаг МОНЦАМЭ, Монголын Гэрэл Зурагчдын Нэгдсэн Холбоо, Үндэсний брэндийн бодлогын зөвлөлтэй хамтран хэрэгжүүлж буй “Өнөөдрийн Монгол” төслийн нээлт 09.00-10.00 цагт МОНЦАМЭ агентлагийн хэвлэлийн төвд болно.
3. Үндэсний мэдээллийн төвд 11.30 цагаас Булган аймгийн Гурванбулаг сумын хэсгийн төлөөлөгч иргэний эрхийг зөрчсөн асуудлаар болон цагдаагийн албан хаагчийн ур чадвар, ёсзүйн талаар "Иргэдийн шударга шүүх" ТББ-аас мэдээлэл хийнэ.
4. Хүүхэд хөгжил хамгааллын зардалтай холбоотой ташаа мэдээлэл сошиал орчинд тархаж эхэлсэнтэй холбогдуулан Гэр бүл хүүхэд залуучуудын хөгжлийн газар 09.00 цагт өөрийн байрны 109 тоотод хэвлэлийнхэнд мэдээлэл хийнэ.
5. Үндэсний мэдээллийн төвд 11.00 цагаас “Дорноговь аймгийн Айраг сумын 4000 гаруй иргэн аюултай хог хаягдлын дунд амьдарч эрүүл мэндээр ноцтой хохирч байна" сэдвээр нутгийн иргэд мэдээлэл хийнэ.
6. 11.00 цагт Оюутолгойн туслан гүйцэтгэгч компаниудад ажиллагчдын эрх ашиг хөндөгдөж байгаа асуудлаар салбарын ҮЭХ-ноос МҮЭХ-ны байранд хэвлэлийн хурал зарлаж байна.
7. Миний дуунууд тоглолтын 20 жилийн ойн хэвлэлийн хурал, "Миний дуунууд" гэрэл зургийн үзэсгэлэнгийн нээлт 15.00 цагт МУЭ-ийн Арт галерейн Best Art танхимд хамт зохион байгуулагдана.

Энэ өдөр дэлхийн түүхэнд:

1. 'Сансрын орон зайн долоо хоног' тохиож байна.
2. Өнөөдөр Иранд Хүүхдийн эрхийг хамгаалах өдөр тохиож буй.
3. 1985 оны энэ өдөр Америкийн алдарт дуучин Бруно Марс мэндэлжээ.
4. 2001 онд АНУ-ын Ерөнхийлөгч Жорж Буш Орон нутгийн аюулгүй алба байгуулна хэмээн зарлажээ.
5. 1982 онд алдарт "Cats" буюу "Муурнууд" жүжиг анх Бродвей театрт тавигдаж, 18 жилийн турш тоглогджээ.