Нийслэлийн Түргэн тусламжийн төв буюу хүмүүсийн нэрлэж заншсанаар 103-ын удирдах албан тушаалтнуудад холбогдох хэргийг Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны тойргийн шүүхэд өчигдөр хэлэлцэхээр товлосон боловч хойшлуулж, ирэх сарын 20-ны 08.30 цагт хурлыг хийхээр боллоо. Тус төвийн эмчилгээ эрхэлсэн орлогч дарга С.Ариунболд ангийн найз, ЦЕГ-ын Шуурхай удирдлага, мэдээллийн төвийн 103 хариуцсан хэлтсийн даргаар ажиллаж байсан, хошууч Т.Бат-Идэр тэргүүтэй хүмүүс хүнд өвчний улмаас гэртээ нас барсан, цагдаагийн байгууллагаар шалгуулах шаардлагагүй гэж үзсэн бүрлээч нарын мэдээлэл, гэрийн хаягийг буяны цогц үйлчилгээ үзүүлдэг аж ахуйн нэгжийнхэнд өгдөг байж. Талийгаач нарын шарилыг гэрээс нь зөөж, эмнэлгүүдийн цогцос хадгалах газарт тухайн аж ахуйн нэгжийнхэн хүргэснийхээ төлбөрт ар гэрээс нь төлбөр авдаг. Ингэж тухайн аж ахуйн нэгжийнхэнд давуу байдал олгосныхоо төлөө Нийслэлийн Түргэн тусламжийн төвийн эмчилгээ эрхэлсэн орлогч дарга С.Ариунболд, Шуурхай удирдлага, мэдээллийн төвийн 103 хариуцсан хэлтсийн дарга асан, хошууч Т.Бат-Идэр тэргүүтэй эмч нар 100 сая төгрөгийн хахууль авсан хэрэгт холбогдсон юм. Нэр дурдсан хоёр хүнтэй хамт нийслэлийн Түргэн тусламжийн төвийн 12 эмч, энгийн байгууллагад ажилладаг мөн тооны иргэнийг яллагдагчаар татсан билээ. Өөрөөр хэлбэл, буяны цогц үйлчилгээ үзүүлдэг аж ахуйн нэгжийн удирдах, гүйцэтгэх албан тушаалтан 10 гаруй хүний гэм буруутай, эсэхийг дэнслэх болоод буй. Тэдний дунд Гавьяат тамирчин, боксчин Т.Үйтүмэнг буяны үйлчилгээ үзүүлдэг нэгэн аж ахуйн нэгжийн гүйцэтгэх захирлаар ажиллаж байхдаа дээрх албан тушаалтнуудад хахууль өгсөн үндэслэлээр Эрүүгийн хуулийн 22.5-1 хэсэгт заасан “Өөртөө давуу байдал бий болгох зорилгоор бусдад албаны чиг үүрэг, бүрэн эрх, албан тушаалын байдалтай нь холбогдуулан мөнгө өгсөн” хэмээн буруутгаад байна.
