Дундговь аймгийн Төв халхын дуулалт жүжгийн театрын уран бүтээлчид “Хуучир хуучилсан түүх” жүжгийг олны хүртээл болгох нь. Тус уран бүтээлийг С.Буяннэмэхийн мэндэлсний 120 жилийн ойд зориулан туурвиж буй аж. Эл жүжигт “Монголын үнэн” сониныг үүсгэн байгуулагч, Монголын залуучуудын эвлэлийг зохион байгуулагч, Монголын зохиолчдын эвлэлийг санаачлагч, нэрт соён гэгээрүүлэгч, их бичгийн хүн С.Буяннэмэхийн амьдралын замнал, үйл хэрэг, эх орныхоо төлөөх цуцашгүй тэмцэл, зөрчлийн тухай өгүүлэх гэнэ. Жүжгийн ерөнхий продюсероор Урлагийн гавьяат зүтгэлтэн Д.Доржсүрэн ажиллаж байна. Жүжгийн зохиолыг Төрийн шагналт, Соёлын гавьяат зүтгэлтэн Д.Төрбат бичиж, Урлагийн гавьяат зүтгэлтэн Ч.Найдандорж найруулах нь. Дүрүүдэд Н.Бямбасүрэн, М.Эрдэнэбаяр, Д.Очирпүрэв, Э.Уранжаргал, Д.Отгонсүрэн, Б.Магсаржав, У.Өнөрбаяр, Г.Намсрай нарын уран бүтээлч тоглоно.
Бэлтгэсэн А.Хангай
