Улаанбаатар хот, 2019 оны 3-р сарын 06
Үдлээд буцдаг хорвоод өнө мөнхийн зүйл гэж үгүй. Аль нэг нь хагдарч, унах цаг ирэхэд, өөр нэг нь цэцэглэн нахиалах нь бий. Аливаа бүхний төгсгөл нь дараагийн зүйлсийн эхлэл болж байдаг. Энэ бүхнийг үзэгчдэд мэдрүүлэхээр залуу уран бүтээлчид нэгдэн “Алимны мөхлөг” хамтарсан үзэсгэлэнгээ ХААН Галерейд дэлгэжээ.
Үзэсгэлэнд нийт зургаан уран бүтээлч оролцож буй бөгөөд Ж.Мөнхжаргал, Б.Бат-Эрдэнэ, Б.Алтантовч, Ж.Дархижав, У.Нарбаясгалан, Б.Азбаяр нар өөрсдийн оюун санааны хил хязгаарыг даван гарч, аливаа бүхний чанад дахь мөн чанарыг эрэлхийлсэн нь холимог техникийн аргаар амилж, үзэгчдийн хүртээл болсон аж. Уран бүтээлчид өмнө нь “Ээж ээ, би гадаа гаръя” үзэсгэлэнгээ гаргаж байсан бөгөөд энэ удаагийнх нь уран зураг, монгол зураг, холимог техникийн болон видео, аудио бүтээл хосолсон байдлаар үзэгчдэд хүрч буйгаараа тун онцлог болжээ.
Аудио бүтээлийн хувьд бусад бүтээлтэйгээ хоршиж, нэг цогц мэдрэмжийг өгөх учраас сонсох, харах мэдрэмжийг нэг дор мэдэрснээр цаг хугацааны тухай, амьдралын олон мөчлөгийн тухай өөрийн эрхгүй эргэн санахад хүргэнэ хэмээн уран бүтээлчид онцолж байлаа.
“Алимны мөхлөг” үзэсгэлэн 3-р сарын 25-ны өдрийг дуустал ХААН Банк Цамхагийн 3-р давхарт байрлах ХААН Галерейд олон нийтэд үнэ төлбөргүй гарч байгаа тул эрхэм уншигч таныг хүрэлцэн ирж үзэхийг урьж байна. Үзэсгэлэн ажлын өдөр 10:00-19:00 цагт, амралтын өдрүүдэд 11:00-18:00 цагт нээлттэй байх болно.
