УИХ-ын хаврын чуулган гишүүдийн 58.7 хувийн ирцтэйгээр эхэллээ

УИХ-ын 2025 оны хаврын ээлжит чуулган өчиг­дөр 74 гишүүн буюу 58.7 хувийн ирцтэйгээр эхэл­лээ. Чуулганы нээлтэд Ерөнхий сайд Л.Оюун-Эрдэнэ, Үндсэн хуулийн цэ­цийн дарга, Ул­сын ерөнхий прокурор, Зас­гийн газрын ги­шүүд, Ерөнхийлөгчийн Тамгын газрын дарга, Үн­дэсний аюулгүй байдлын зөвлөлийн нарийн бич­гийн дарга, УИХ-д ажлаа шууд тайлагнадаг бай­гууллагын удирдлагууд, Монгол Улс дахь дип­ломат төлөөлөгчийн га­зар, олон улсын бай­гуул­лагын суурин тө­лөө­лөг­чийн газрын тэр­гүү­нүүд оролцсон юм. 
Чуулганыг нээж УИХ-ын дарга Д.Амар­баяс­галан үг хэлэв. Тэрбээр “УИХ-ын гишүүд зав­сар­лагын хугацаанд иргэдтэй нүүр тулан уулзаж, нөхцөл байдалтай газар дээр нь танилцан, санаа оноогоо хуваалцаад ирсэн нь энэ хаврын чуулганы хууль тогтоомжийн төслүүдийн хэ­лэл­цүүлэг ажил хэрэгч, бүтээлч өрнөхөд нө­лөө­лөх нь гарцаагүй. Биднээс бүрэн эрхийн хүрээ хязгаар, боломжоос хальж давсан зүйлийг иргэд хүсэхээс илүүтэй парламент нь парламент шиг ажиллахыг хэлж, сануулж байлаа. Мөн иргэдээ ажил, орлоготой байлгах, үр хүүхдүүдээ ор­чин нөхцөл хангагдсан сургууль, цэцэрлэгт хам­руулах, эрүүл мэндийн үйлчилгээ ойр байх, зам харгуй, дэд бүтцийг хөгжүүлэх гээд наад захын амин чухал зүйлсийг хөндөн үг дайв. УИХ-ын ги­шүүдийн үр дүнтэй оролцоо, ирцийг сайж­руулах шаардлагатай байгааг сонгогчид хатуу шүүм­жилсэн. Тиймээс иргэдийн төлөөлөл болж сонгогдсон гишүүд өргөсөн тангарагтаа үнэнч байж хүлээсэн үүргээ нэр төртэй бие­лүүлэх ёстой” гэв. Тэрбээр үргэлжлүүлэн “Экс­пор­тын гол түүхий эд болох нүүрсний үнэ бид­ний төсөөлж байснаас өндөр хувиар буурч, нэг­дүгээр сарын урьдчилсан гүйцэтгэлээр төс­вийн орлого өнгөрсөн оны мөн үеийнхээс 38.9 хувиар бага төвлөрч, төсвийн тэнцэл 493 тэр­бум төгрөгийн алдагдалтай гарсан. 2024 оны нэг­дүгээр сард төсөв 676 тэрбум төгрөгийн ашиг­тай байлаа. Иймд цаашид сэргэж эхэлж бай­сан эдийн засгийн идэвхжлийг хадгалах нь үүсээд буй орчин нөхцөлд юу юунаас илүү чухал болоод байна. Гадаад орчны хүчин зүйл­сээс шалтгаалсан эмзэг байдлаас гарахын тулд дотоод эдийн засгийн бүтцээ өөрчилж, үйлд­вэрлэлийг бодлогоор дэмжих хэрэгтэй. Ингэхдээ ирээдүйд улс орны эдийн засгийг олон суурьт, илүү төрөлжсөн бүтэц рүү шилжихэд хэрэгтэй арга хэмжээнүүдийг, тэр дотроо бидний өрсөлдөх чадварыг нэмэгдүүлэх дэд бүтцийн хөрөнгө оруулалтуудыг хэрхэвч ор­хиг­дуулж болохгүй” хэмээсэн юм. 
УИХ-ын дарга ийнхүү үг хэлсний дараа хол­богдох хуульд заасны дагуу чуулганы нэгдсэн хурал­дааныг хаалттай горимд шилжүүлж, Үн­дэс­ний аюулгүй байдлын зөвлөлийн мэ­дээл­лийг сонсов. 
Энэ өдөр УИХ-ын даргад гишүүд хуулийн хэд хэдэн төсөл өргөн барьсан юм. Тодруулбал, УИХ-ын гишүүн О.Цогтгэрэл, Ж.Баярмаа, Ч.Ло­дойсамбуу, Х.Тэмүүжин, С.Цэнгүүн, С.Эр­дэнэ­болд нар УИХ-ын хяналт шалгалтын тухай хуульд өөрчлөлт оруулах тухай хуулий төсөл, УИХ-ын гишүүн О.Амгаланбаатар Амьтны ту­хай хуульд нэмэлт оруулах тухай хуулийн төс­лийг өргөн барилаа. О.Амгаланбаатар “Чо­ныг зөвшөөрөлгүй агнасан тохиолдолд хү­лээл­­гэх торгууль, төлбөрийн хэмжээг хууль тог­тоом­жоор тодорхой зохицуулсан. Ихэнх то­хиолдолд иргэн амь нас, мал сүргээ хам­гаа­ла­хын тулд чоныг агнасан ч “зөв­шөөрөлгүй” гэх шалтгаанаар торгууль, төлбөр төлдөг. Энэ нь Үндсэн хуульд заасан амьд явах, өмчтэй байх эрх зөрчигдөж байна” хэмээсэн юм. Түүнчлэн УИХ-ын гишүүн Г.Уянгахишиг Өмгөөллийн ту­хай хуулийн зарим заалтыг хүчингүй болсонд тоо­цох тухай хуулийн төслийг өргөн мэдүүлэв.

Ч.Туяа