Аадар борооны улмаас эвдэрч, сүйдсэн замуудаа бүрэн засаж дуусаагүй байхад дахин өөр чиглэлд зорчих хөдөлгөөнийг хязгаарлахаас аргагүйд хүрсэн талаар “Зам, тээврийн хөгжлийн төв” ТӨҮГ-аас мэдээлсээр байна. Тухайлбал, энэ сарын 20-24-нд орсон борооны улмаас Хөвсгөл аймгийн Мөрөн сумаас Хатгал, Дорноговийн Сайншандаас Замын-Үүд, Ханги боомт, Булганы Хутаг-Өндөрөөс Тэшиг чиглэлийн авто замд эвдрэл үүсэж, далан, гүүр, гүүрэн байгууламж нурсан тохиолдлууд гарсан. Энэ сарын 26-ны байдлаар гэхэд Эгийн гүүрний сэтэрсэн далан, Мөрөн-Хатгал, Сайншадын замд үүссэн нүхэн эвдрэлийг засахаар замын компаниуд шуурхай ажиллаж байгааг дээрх төвөөс мэдээлсэн юм. Тэгвэл А14 дугаартай, Ховд аймгийн Манхан-Булган сум чиглэлийн олон улсын чанартай авто зам өнгөрсөн амралтын өдрүүдэд хүчтэй аадар борооны улмаас мөн эвдэрчээ. 120-133 дахь км-ийн хооронд уулын чулуулгийн нуранги үүссэн тул зорчих хөдөлгөөнийг хаахаас аргагүй болжээ. “Ховд-АЗЗА” ТӨХК-ийн инженер, техникийн ажилчдын бүрэлдэхүүн эвдрэлийг засаж, хөдөлгөөнийг хэвийн болгохоор ажиллаж байгаа гэнэ. Тухайн хэсэг нь улсын хил чиглэлийн, хөдөлгөөний ачаалал ихтэй авто зам юм байна.
Өчигдрөөс илүү маргаашийг
бүтээхийн төлөө
