Өмнөговь аймгийн нийт малчин өрхөд өвөл хаврын хүндрэлийг даван туулахад дэмжлэг үзүүлэх асуудлыг аймгийн ИТХ-д өргөн барилаа. Тодруулбал, Засгийн газрын 62 дугаар тогтоолын дагуу Өмнөговь аймаг орон нутгийн төсвийн давсан орлогын тодорхой хувийг малчдадаа туслах цогц арга хэмжээнд зарцуулахаар төлөвлөж уг асуудлыг өнөөдөр аймгийн Засаг дарга, аймгийн ИТХ-д хэлэлцүүлэн батлуулахаар болжээ.
Энэ талаар тус аймгийн Засаг дарга Р.Сэддорж хэлэхдээ "Өмнөговь аймгийн 15 сумын хэмжээнд 6246 малчин өрх байгаа бөгөөд олон жилийн бороо ногоогүйн ган гачиг, энэ жилийн их хүйтэн, цас зуд гээд маш хүнд цаг үеийг малчин түмэн маань туулж явна. Иймд малчид болон эрдэнэт мал сүргээ хайрлан хамгаалах, өвс тэжээл, хүн малын эм эмнэлгийн хэрэгсэл тусламж үйлчилгээ, отор нүүдэл унаа тээврийн зардал зэргийг цогцоор нь дэмжихээр ийнхүү ИТХ-д оруулж байна" гэлээ.
