“Монголд зочлох жил” санаачилгын хүрээнд, аялал жуулчлалыг дэмжих зорилгоор БОАЖЯ, Аялал жуулчлалын мэргэжлийн холбоо орон нутгийн холбогдох байгууллагуудтай хамтран ирэх сарын2-3-нд Хатгалд зохион байгуулах “Хөх сувд-2024” олон улсын мөсний баярын хөтөлбөрийг баталжээ. Өнөө жилийн арга хэмжээг байгалийн аялал жуулчлалыг дэмжих зорилготой “Хөх баавгай” төслийг олон нийтэд сурталчлан таниулахад чиглүүлэх бөгөөд тусгайлан бэлтгэсэн талбай, мөсөн хотхонд спорт, урлаг, соёлын олон үйл ажиллагаа явуулахаар төлөвлөсөн байна. Жишээлбэл, баярын эхний өдөр “Хоймор нутгийн эгшиглэн” тоглолт, “Хөх баавгай” лазерын шоу, далай ээжид хүндэтгэл үзүүлэх ёслол, тахтай морьдын уралдаан, тэшүүр, дарвуулт чарга, мөсний шагай, сур харвааны тэмцээн зохион байгуулах нь. Харин удаах өдөрт нь олон ястны ардын урлагийн тоглолт, мөсөн дээрх сүмо, олс таталтын тэмцээн, бөөгийн тахилга, галын наадам зэргийг жуулчдад сонирхуулах аж. Энэ жилийн“Хөх сувд”-д Өмнөд Америкийн Эквадор улсын үндэсний хөгжмийн“Qirwa Anka” хамтлаг оролцож, мөсний баярыг зорин ирсэн хүмүүст уран бүтээлээ толилуулахаараа онцлог гэнэ.
МИАТ ТӨХК уг арга хэмжээний тов, хөтөлбөр тодорхой болсонтой холбогдуулан энэ өдрүүдэд үйлдэх нэмэлт нислэгийн хуваариа танилцууллаа. Тус компани ирэх сарын2-ны өдөр Улаанбаатараас Хатгал, Хатгалаас Улаанбаатар чиглэлд тус бүр хоёр, 3-нд нэг нислэг үйлдэхээр төлөвлөсөн байна.
