Өмнөговь аймаг Түмэн тэмээний баяраа 25 дахь жилдээ тэмдэглэж байна. Тэмээг өсгөн үржүүлэх, тэмээн соёл спортыг хөгжүүлэх, тэмээ маллагааны арга ухаан, зан үйлээ уламжлан өвлөх зорилгоор тус аймаг 1997 оноос Тэмээний баяраа зохион байгуулж иржээ. 2016 онд тус аймаг мянган тэмээ бүртгүүлж дэлхийн Геннисийн амжилтыг тогтоож байсан бол өнөөдөр 160 000 шахам толгой тэмээ тоолуулж улсдаа хамгийн олон тэмээтэй аймаг боллоо. Монгол Улс 2023 онд 473 900 толгой тэмээ тоолсноос гуравны нэг нь Өмнөговь аймгийнх.
Өмнөговь аймгийн БОАЖГ-ын дарга Х.Отгонмөнх “Энэ жил уур амьсгалын өөрчлөлттэй холбоотойгоор тэмээний баяраа нэг сараар наашлуулж зохион байгуулж байна. Цаашид мөн хоёрдугаар сарын эхээр зохион байгуулж байхаар манай аймаг шийдвэрлэсэн. Түмэн тэмээний баярт Говь-Алтай , Дундговь, Өвөрхангай, Баянхонгор аймгаас тэмээчид оролцож байна. Мөн дотоод гадаадаас оролцогч жуулчдын тоо ч өссөөр байна” гэж ярилаа. УИХ-ны даргын шийдвэрээр өнгөрсөн жилээс тэмээний алдарт уяач цол олгож эхэлсэн. Анхны алдарт уяач цолыг Өмнөговь, Баянхонгор аймгийн малчид авч байжээ.
Түмэн тэмээний баярт оролцогчид, жуулчид тэмээ унах, тэмээтэй парадад жагсах зэргээр наадмыг зөвхөн үзэх биш өөрсдөө оролцоно. Тэмээний баяр тэмээний поло, тайлаг, тором гээд тэмээний уралдаан, сайхан тэмээтэй хосын тэмцээн, тэмээн парад, ингэний айрагны баяр, ингэний сүүн бүтээгдэхүүний үзэсгэлэн худалдаа, “мэндлэх хүндлэх ёс” хөөрөгний үзэсгэлэн, Дундговь аймгийн “Өмнийн говийн өв соёл” үзэсгэлэн, тэмээний ноосон эдлэл, бүтээгдэхүүний загварын шоу зэрэг нийт 20-иод хөтөлбөртэй.
