Гадаад хамтын ажиллагааны хүрээнд нийслэлд 10 эрүүл мэндийн байгууллагыг хот төлөвлөлттэй уялдуулан байгуулах асуудлыг судалж, танилцуулах ажлын талаар Нийслэлийн Эрүүл мэндийн газрын дарга П.Эрхэмбулган мэдээлэл өглөө. Тэрбээр “Ажлын хэсэг байгуулагдан, хүн амын өвчлөл, нас баралтын тэргүүлэх шалтгаан, өрхийн эрүүл мэндийн төвүүдийн тоонд тулгуурлан таван чиглэлийн тусламж үйлчилгээг 10 эрүүл мэндийн байгууллагад нэвтрүүлэх саналыг боловсрууллаа. Зарим дүүрэгт нэгдсэн эмнэлгийн зохион байгуулалттай эрүүл мэндийн байгууллага байгуулах ажил эхэлж байна. Ингэхдээ, төрөлжсөн төвийн зохион байгуулалтаар төлөвлөлтөө хийхээр болсон. Тухайлбал, Гэмтэл, сэргээн засах чиглэлийн эмнэлгийг Сонгинохайрхан, Баянзүрх, Налайх дүүрэгт, Харвалт, шигдээсийн төвийг Сонгинохайрхан, Баянзүрх, Чингэлтэй дүүрэгт, Хөнгөвчлөх төвийг Хан-Уул, Сүхбаатар дүүрэгт, Хордлого, яаралтай тусламжийн төвийг Баянгол дүүрэгт, Гемодиализийн төвийг Хан-Уул дүүрэгт байгуулах саналыг гаргаж, Ажлын хэсгээс санал авч байна” гэлээ.
