Орхон аймагт анх удаа хүн амын эрүүл аж төрөх амьдралын зөв дадлыг хүүхэд наснаас нь хэвшүүлэх зорилгоор “Шүд угаалтын аварга шалгаруулах тэмцээн”-ийг аравдугаар сарын 27-ны өдөр зохион байгууллаа. Тэмцээнд 23 багийн 184 сурагч, 152 сургагч багш оролцож, зургаан өртөөт даалгавар биелүүлсэн.
Тэргүүн байранд “Билэгт Өргөө” сургуулийн “Эрүүл шүд” баг, дэд байранд 1-р дунд сургуулийн “Шигтгээ” баг, гутгаар байранд 5-р дунд сургуулийн “Happy teeth” баг тус тус шалгарлаа. Мөн “Шилдэг эрэгтэй угаагч”-аар 14-р дунд сургуулийн сурагч Т.Тэнүүн, “Шилдэг эмэгтэй угаагч”-аар 4-р дунд сургуулийн сурагч М.Оюундарь нар шалгарчээ.
Орхон аймгийн Засаг даргын Тамгын газрын дэмжлэгээр зохион байгуулсан тус тэмцээнд Эрүүл мэндийн яамны Нүүр ам судлалын салбар зөвлөлийн гишүүн Л.Хэнтий, Б.Отгонсайхан тэргүүтэй АШУҮИС-ийн Нүүр ам судлалын сургууль, Монголын Шүдний Ерөнхий эмч нарын “Талст” холбоо, Орхон аймгийн Эрүүл мэндийн газар, Боловсрол шинжлэх ухааны газар, Шүдний мэргэжилтнүүдийн холбооны төлөөллүүд оролцож, ивээн тэтгэгчээр “Монголиан стар дистрибюшн” ХХК хамтран ажилласан. Тэмцээний үеэр эмч, мэргэжилтнүүд ЕБС-ийн 4, 5-р ангийн сурагчдын амны хөндийн эрүүл мэндийн боловролыг дээшлүүлэх, шүдээ зөв угаахын ач холбогдлыг таниулах, шүд угаах, цэвэрлэх аргачлалыг зааж, зөвлөгөө өглөө. Эрүүл мэндийн яамнаас хэрэгжүүлж буй эрт илрүүлэх үзлэгээр хүүхдэд шүд цоорох өвчин зонхилон илэрчээ. Тиймээс дээрх үйл ажиллагааг зохион байгуулсан байна.
