Монгол Улсаас Бүгд Найрамдах Тажикистан Улсад хавсран суух Онц бөгөөд Бүрэн эрхт Элчин сайд Д.Баярхүү тус улсын Ерөнхийлөгч Эмомали Рахмонд 2023 оны аравдугаар сарын 23-нд Итгэмжлэх жуух бичгээ өргөн барив.
Элчин сайд Д.Баярхүү Монгол Улсын Ерөнхийлөгч У.Хүрэлсүхийн мэндчилгээг Бүгд Найрамдах Тажикстан Улсын Ерөнхийлөгч Э.Рахмонд уламжилж, хоёр улсын уламжлалт найрсаг харилцааг бэхжүүлэх, худалдаа, эдийн засаг, соёл, боловсрол, олон улс, бүс нутгийн тавцан дахь хамтын ажиллагааг өргөжүүлэн хөгжүүлэх асуудлыг онцолжээ.
Ерөнхийлөгч Э.Рахмон Элчин сайдыг хариуцлагатай үүрэгт ажилдаа орж байгаад нь халуун баяр хүргэж, Монгол Улс, БНТажУ хоорондын улс төр, эдийн засаг, ногоон хөгжил, эрчим хүч, соёл, хүмүүнлэгийн зэрэг тэргүүлэх чиглэлд харилцан ашигтай хамтын ажиллагааг өргөжүүлэн хөгжүүлэхэд бүх талын дэмжлэг, туслалцаа үзүүлэхээ илэрхийлэв.
Мөн Бүгд Найрамдах Тажикстан Улс “Нээлттэй хаалганы стратеги” бодлогын хүрээнд цаашид ч Монгол Улстай тогтоосон уламжлалт найрсаг харилцааг бэхжүүлэх, НҮБ болон олон улсын тавцан дахь хамтын ажиллагааг өргөжүүлэхийн төлөө байгааг тэмдэглэлээ.
