Коронавируст халдвар /КОВИД-19/-ын цар тахлын онцгой байдлын үед Засгийн газраас авч хэрэгжүүлсэн төлөвлөгөө, төсөл хөтөлбөрүүдийн санхүүгийн зарцуулалт, гадаадын орнуудаас авсан зээл, тусламж, иргэн, аж ахуйн нэгжүүдийн хандив, тусламж болон тэдгээрийн орлого, зарлагыг нийтэд ил болгох тухай асуудлаар Ерөнхий хяналтын сонсголыг зохион байгуулах үүрэг бүхий ажлын хэсгийн мэдээллийг сонслоо.
УИХ-ын Эдийн засгийн байнгын хорооны 2023 оны зургадугаар сарын 27-ны өдрийн 14 дүгээр тогтоолоор Короновируст халдвар /Ковид-19/-ын цар тахлын онцгой байдлын үеэр Засгийн газраас авч хэрэгжүүлсэн төлөвлөгөө, төсөл хөтөлбөрүүдийн санхүүгийн зарцуулалт, гадаадын орнуудаас авсан зээл, тусламж, иргэн, аж ахуйн нэгжүүдийн хандив, тусламж болон тэдгээрийн орлого, зарлагыг нийтэд ил болгох тухай асуудлаар Ерөнхий хяналтын сонсгол зохион байгуулах үүрэг бүхий ажлын хэсгийг байгуулсан. Тус ажлын хэсгийг Улсын Их Хурлын гишүүн О.Цогтгэрэл ахалж, бүрэлдэхүүнд Улсын Их Хурлын гишүүн Ж.Батсуурь, Б.Баттөмөр, М.Оюунчимэг, Г.Тэмүүлэн нар ажиллаж байна.
Ажлын хэсэг ээлжит чуулганы завсарлагааны үеэр Ерөнхий хяналтын сонсгол зохион байгуулах бэлтгэл хангахаар ажилласан бөгөөд 20 орчим байгууллага руу холбогдох материал ирүүлэх хүсэлтийг албан бичгээр хүргүүлжээ. Түүнчлэн сонсголд хянан шалгагч бус, сонсголын сэдэвтэй холбоотой цугларсан баримт, материалд үнэлэлт, дүгнэлт өгөх шинжээч шаардлагатай хэмээн үзэж, томилуулах хүсэлтээ Байнгын хороонд хүргүүлсэн хэмээн О.Цогтгэрэл гишүүн танилцууллаа.
Ерөнхий хяналтын сонсголыг аравдугаар сарын 23, 24-ний өдрүүдэд зохион байгуулахаар товлосон ч шинжээч томилогдоогүй, мэдээлэл, материал хангалтгүй байгаа тул сонсголыг хойшлуулах хүсэлтийг ажлын хэсгээс гаргажээ.
Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуулийн биелэлтийг сар тутам нээлттэйгээр хэлэлцэж, хяналт тавих шаардлагатай бол Улсын Их Хурлын холбогдох Байнгын хорооны хуралдаанаар хэлэлцүүлэх, санал, дүгнэлт гаргах үүрэг бүхий Түр хороо хоёр жил ажилласан. Дээрх хугацаанд холбогдох материалуудыг нэгтгэж, судалж, хэлэлцүүлгүүдийг зохион байгуулсан. Тодруулбал, Улсын Их Хуралд шаардлагатай материалууд байгаа учир түүнд тулгуурлан сонсголыг товлогдсон хугацаанд зохион байгуулах нь зүйтэй гэдэг байр суурийг илэрхийлсэн. Ерөнхий хяналтын сонсголыг зохион байгуулах үүрэг бүхий ажлын хэсэг аливаа шийдвэр, үйл ажиллагаагаа холбогдох хууль тогтоомжид нийцүүлэх шаардлагатай гэдэг тайлбарыг Байнгын хорооны дарга Ц.Цэрэнпунцаг илэрхийллээ.
