НЗДТГ-ын Нийгмийн бодлогын хэлтэс, Нийслэлийн Гэр бүл, хүүхэд, залуучуудын хөгжлийн газар, Эрүүл мэндийн газар, “Бяцхан тэмүүлэл” хүүхдийн сэргээн засах төв хамтран АШУҮИС-ийн I-VI дамжааны 50 оюутныг эрүүл мэндийн сайн дурын ажилтнаар бэлтгэх хөтөлбөрт хамруулж, батламж гардууллаа.
Залуучуудын хөдөлмөр эрхлэлт, нийслэлийн хөгжилд залуучуудын оролцоог нэмэгдүүлэх зорилгоор тэдний гаргасан санал санаачилгыг дэмжин, таван их сургуулийг сонгон авч, 800 гаруй оюутан, залуустай уулзан, оюутнуудад чиглэсэн цагийн ажлын байрыг бий болгох, нийгэмд чиглэсэн үйл ажиллагаа зохион байгуулж байна. Үүний нэг хэсэг болгон, хөгжлийн бэрхшээлтэй, чадвар алдалттай хүүхдүүдэд хүрч, эрүүл мэндийн тусламж, үйлчилгээг ойлтуулах энэхүү Эрүүл мэндийн сайн дурын ажилтан бэлтгэх хөтөлбөрийг эхлүүлсэн билээ.
Уг хөтөлбөр нь оюутан залууст цагийн ажлын байрыг бий болгохоос гадна, ажлын байранд дадлагажих, суралцах, нийгмийн харилцаанд бэлтгэх олон талын ач холбогдолтой юм. Хөтөлбөрийн хүрээнд Баянзүрх дүүргийн 28 хорооны өрхийн эрүүл мэндийн төвүүдтэй хамтран 0-16 насны хөгжлийн бэрхшээлтэй болон чадвар алдалттай 1137 хүүхдийн судалгааг нэгтгэж, 983 хүүхдэд хүрч ажилласан байна. Мөн уг 983 хүүхдэд нийслэлийн “Бяцхан тэмүүлэл” хүүхдийн сэргээн засах төвөөс эрүүл мэндийн тусламж үйлчилгээ үзүүлж, 2000 гаруй иргэнд эрүүл мэндийн боловсрол олгожээ.
