Гадаад харилцааны сайд Б.Батцэцэг Австралийн Холбооны Улсад хийж буй албан ёсны айлчлалынхаа хүрээнд Сенатын Ерөнхийлөгч Сью Лайнс, Австралийн Парламентын Төлөөлөгчдийн танхимын дарга Милтон Дик нартай уулзаж, Сенатын болон Төлөөлөгчдийн танхимын үйл ажиллагаатай танилцлаа. Монгол, Австралийн Өргөтгөсөн түншлэлийн харилцаа ардчилал, хүний эрх, эрх чөлөө зэрэг нийтлэг үнэт зүйлсэд тулгуурлан идэвхтэй өргөжин хөгжиж байгаад сэтгэл хангалуун байгааг талууд илэрхийлж, хоёр улсын хууль тогтоох байгууллага хоорондын хэлхээ холбоог бэхжүүлэх, парламент дахь найрамдлын бүлэг хоорондын хамтын ажиллагааг өргөжүүлэх талаар дэлгэрэнгүй санал солилцжээ.
Уулзалтын үеэр сайд Б.Батцэцэг Монгол Улсын Их Хурлын дарга Г.Занданшатарын халуун дотно мэндчилгээг уламжилж, Монгол Улсад айлчлахыг урьсан урилгыг Сенатын Ерөнхийлөгч Сью Лайнс болон Парламентын Төлөөлөгчдийн танхимын дарга Милтон Дик нарт тус тус гардууллаа.
