Онцгой байдлын ерөнхий газраас Япон Улсын Олон улсын хамтын ажиллагааны байгууллага ЖАЙКА-тай хамтран “Монгол Улсын Газар хөдлөлтийн гамшгаас хамгаалах чадавхыг бэхжүүлэх” II шатны төслийг хэрэгжүүлж байна.
Төслийн хүрээнд ОБЕГ-ын Ажиллагааны удирдлагын тасгийн дарга, хурандаа Ж.Дамдинсүрэнгээр ахлуулсан төлөөлөгчид Япон Улсад энэ сарын 17-27-ны өдрүүдэд сургалтад хамрагдан, туршлага судаллаа.
Барилга хот байгуулалтын яам, Сангийн яам, ОБЕГ, Нийслэлийн боловсролын газар, Монголын барилгын инженерүүдийн холбооны холбогдох 8 ажилтан, алба хаагч тус улсын Итабаши дүүргийн Гамшгаас хамгаалах төвийн үйл ажиллагаатай танилцсан юм.
Мөн Япон Улсын газар хөдлөлтийн тэсвэрлэлтийг хангахад чиглэсэн бодлого, арга хэмжээний талаар мэдээлэл авч, орон нутгийн гамшгаас хамгаалах төлөвлөгөө, засаг захиргаанаас зохион байгуулж байгаа сургуулийн барилгын хүчитгэл, дүүргийн захиргааны барилга болон тус дүүргийн дунд сургуулийн хүчитгэлийн үйл явцтай газар дээр нь танилцаж, газар хөдлөлтийн аюулаас урьдчилан сэргийлэх туршлага судаллаа.
