Монгол тулгатны эрхэм хүн, их найрагч Б.Лхагвасүрэнгийн нэрэмжит сангийн нээлт өнөөдөр өргөн дэлгэр боллоо. Сангийн нээлтэд зориулан Занабазарын нэрэмжит Дүрслэх Урлагийн Музейн түүний эдэлж хэрэглэж байсан эд хэрэглэл, нэртэй уран бүтээл, шүлэг найргийн эх гар бичмэл, зурсан зурсан зураг, хувийн цуглуулга бүхий сонирхолтой үзэсгэлэнг дэлгэлээ. Үзэсгэлэнгийн танхимд дэлгэсэн эдгээр үзмэрүүдийн ихэнхийг нь үзэгчид анх удаа л тольдон харж буй нь гэнэ. Эрхэм найрагчийг яруу найрагч гэдгээр нь хэн хүнгүй мэддэг ч авьяаслаг зураач гэдгийг нь тэр болгон мэдэхгүй байж магадгүй. Түүний зурж бүтээсэн олон номын хавтас, зураасан зургийн бүтээлүүдийг нь энд дэлгэжээ.
Б.Лхагвасүрэнгийн нэрэмжит санг үүсгэн байгуулсан нь энэ эрхэм хүмүүний бүтээлүүдийг олон улсад сурталчлан таниулж, оюуны өмчийг эрхэмлэн дээдэлж, соён гэгээрүүлэх, олон түмэндээ оюуны өвийг түгээх зорилготой аж.
