Өнгөрсөн өдрүүдэд ойд буй модыг үндсээр нь сугалж нийслэлд авчирч, суулгах үйлдэл иргэдийг бухимдуулсан. Тэгвэл БОАЖЯ-наас ойгоос зулзаган мод шилжүүлэн суулгахыг хориглосон шийдвэр гаргажээ. Тодруулбал, "Ойн экосистемийн тэнцвэрт байдлыг хадгалах, нөөцийг зохистой ашиглах, ойн хэвийн өсөлт, нөхөн сэргэлтийг хангах зорилгоор байгалийн ойгоос зулзаган модыг түймрээс хамгаалах халз зурвас, эрчим хүчний шугам сүлжээний хамгаалалтын зурвас гаргахаар төлөвлөсөн болон стратегийн ач холбогдол бүхий ашигт малтмалын ордтой давхацсан ойн сангийн талбайгаас аймаг, нийслэлийн Байгаль орчны газрын зөвшөөрснөөс бусад тохиолдолд шилжүүлэн суулгахыг 2030 оны 01 дүгээр сарын 01-ний өдөр хүртэл хугацаанд хориглолоо" гэж мэдээлэв.
