Нэр бүхий хуульчид Х.Баттулгыг Ардчилсан намын даргаар бүртгүүлэх хүсэлтийг Улсын дээд шүүхэд өнөөдөр хүргүүллээ. 2022 оны дөрөвдүгээр сарын 7-ны өдөр болсон АН-ын ээлжит бус Их хурлаар Х.Баттулга нь намын даргаар батламжлагдсан гэж үзэн ийнхүү УДШ-д бүртгүүлэх хүсэлтийг хүргүүлж байгаа аж.
Завхан аймгийн Ардчилсан намын дарга Д.Батсайхан энэ талаар “Намыг хэн нэг хүн өмчлөх эрхгүй. Ардчилсан Нам 200 мянган гишүүний 74.5 хувь энэ шийдвэрийг дэмжсэн бол энэ хамгийн зөв шийдвэр гэсэн үг. Мөн АН-ын дүрэмд намын даргын сунгаатай холбоотой нэг ч өөрчлөлт ороогүй. Тиймээс энэхүү намын даргын сунгаа нь Улсын дээд шүүхийн 38 дугаар тогтоолоор хүлээсэн үүргийг хүлээж байгаа арга хэмжээ.
АН-ын дүрэмд намын даргаа бүх гишүүдээс сонгоно. Үүний дараа Их хурлаараа батламжилна гэсэн заалт одоо ч хүчин төгөлдөр байгаа. Тиймээс үүнд ямар нэг дүрмийн зөрчил байхгүй. Мөн Улсын Дээд Шүүх Х.Баттулгыг АН-ын даргаар бүртгэхгүй байх үндэслэл байхгүй. Учир нь шийдвэрийг намын бүх гишүүн гаргана. Харин гаргасан шийдвэрийг нь Улсын дээд шүүх бүртгэх үүрэгтэй. Тиймээс үүргээ хэрэгжүүлэх ёстой” хэмээв.
Тэд баримт бичгийн бүрдэл гэх 9978 хуудас буюу 55 боть материалыг УДШ-д хүргүүлсэн байна.
