Тархины саажилт болон бусад төрлийн эмгэгтэй хүүхдүүдтэй эцэг, эхийн төлөөлөл өчигдөр мэдээлэл хийлээ. Тэд ийм өвчтэй хүүхдүүдийн эрх ашгийг хамгаалж, эрүүл мэндийн үйлчилгээ, оношилгоо, эмчилгээг сайжруулах талаар хөндсөн юм. Манай улсад хөгжлийн бэрхшээлтэй 0-17 насны 11 453 хүүхэд байгаагийн 63.4 хувь нь хөдөлгөөн, сэтгэц, хавсарсан бэрхшээлтэй гэсэн тоо байдаг аж. Монгол Улсад хөгжлийн бэрхшээлтэй, тэр дундаа тархины саажилт, унаж татдаг өвчтэй хүүхдүүдэд чиглэсэн орчин үеийн, чанартай, ялгаварлан гадуурхалгүй, хүнлэг харилцаа бүхий эрүүл мэндийн үйлчилгээ, оношилгоо, эмчилгээ хангалтгүй байгааг тэд хэлэв. Иймд эцэг, эхчүүд нэгдэн Ерөнхийлөгч, Ерөнхий сайд, Эрүүл мэндийн сайдад хандан дараах шаардлагыг тавьсан юм. Нэн тэргүүнд хөгжлийн бэрхшээлтэй хүүхдүүдийг Монголдоо зөв оношлохыг шаардав. Үүний тулд дэлхийн жишигт нийцсэн дэвшилт технологи бүхий оношилгооны лаборатори, тоног төхөөрөмж яаралтай оруулж ирэх, өндөр хөгжилтэй орнуудын хүүхдийн мэдрэлийн эмч нартай хамтран ажиллаж, оношийг зөв тогтоох шаардлагатайг дурдсан юм. Мөн саажилттай хүүхдэд зориулсан нэгдсэн эмнэлэг, тасаг шинээр бий болгож, оношилж чадахгүй байгаа тархины бусад төрлийн эмгэгийг гадаадад эмчлүүлэх өвчний жагсаалтад оруулж, зардлыг улсаас санхүүжүүлэх, эрүүл мэндийн шаардлага хангасан эмүүдийг оруулж ирж, хөнгөлөлттэй үнээр олгох зэргийг онцгойлон хүссэн юм. Тархины саажилт болон бусад төрлийн өвчтэй хүүхдүүдийн олонх нь төрөх үеийн хүндрэлээс шалтгаалж насан туршдаа эмгэгтэй болсон тул эмч, эх баригч нарын ур чадварыг сайжруулах хэрэгтэйг ч хэлэв. Бас эмч нар тархины саажилт, уналт таталт, аутизм, тархины бусад төрлийн эмгэгийг ялган оношлохдоо таарууг шүүмжилсэн. “Тархины саажилт гэх нэрийн доор бүгдийг нь оруулж, буруу онош тавьж байна. Хэдий болтол Монгол Улс ийм хүүхдүүдийн эрх ашгийг хохироох юм бэ” хэмээн эцэг, эхийн төлөөлөл болсон “Эрхэм нандин сувд” ТББ-ынхан хэллээ.
