Өчигдөр /2019.09.23/ Нью-Йорк хотод НҮБ-ын уур амьсгалын өөрчлөлтийн асуудлаарх дээд хэмжээний уулзалтад эхлэв. Чуулга уулзалтад дэлхийн 60 гаруй орны удирдагчид оролцож байна. НҮБ-ын Ерөнхий нарийн бичгийн дарга Антонио Гутеррешийн зохион байгуулж буй энэхүү уулзалт нь дэлхийн дулааралтай тэмцэх чиглэлд гаргах хүчин чармайлтыг нэмэгдүүлэх зорилготой юм. Уулзалтын үеэр уур амьсгалын өөрчлөлтийн эсрэг тэмцэгч 16 настай охин уур амьсгалын өөрчлөлтийн эсрэг дорвитой тэмцээгүй хэмээн дэлхийн удирдагчдыг буруутгасан байна. “Та нар бол урвагчид. Та нарын хий хоосон үг миний хүүхэд нас, мөрөөдлийг хулгайлсан....Та нарын ярьдаг зүйл бол зөвхөн мөнгө болон эдийн засгийн өсөлтийн тухай дуусдаггүй үлгэр...” гэж Швед охин уур хилэнгээр дүүрэн үгээ хэлжээ. Үгийнхээ төгсгөлд Грета Тунберг нэн даруй арга хэмжээ авж хэрэгжүүлэхийг дэлхийн удирдагчдад уриалаад, “Бид та нарыг харсаар байх болно” гэсэн байна.
