Өнөөдөр гадаа 10 градусын дулаан байна. Цаг, агаар, зурхай, валютын ханш гээд таны энэ өдрийн ажилд хэрэгтэй бүхий л мэдээллийг багцлан хүргэе. Өдрийг сайхан өнгөрүүлээрэй.
4 дүгээр сарын 11-ний өдөр
Өглөөд заавал мэдэж байх ёстой зүйлүүд:
- Өнөөдөр бол жилийн 101 дахь өдөр бөгөөд он дуусахад 264 хоног үлдлээ.
- Цаг агаар өдөртөө 10 хэмийн дулаан бол шөнөдөө -4 градус хүйтэн байх нь ээ.
- Билгийн тооллын 6, найман цагаан мэнгэтэй шар бар өдөр. Өнөөдөр үсээ авахуулах буюу засуулбал өнгө зүс сайжрах гэнэ. Энэ өдөр морь жилтнээ аливаа үйлийг хийхэд эерэг сайн, үхэр, луу, хонь, нохой жилтнээ сөрөг муу нөлөөтэй тул аливаа үйлийг хийхдээ анхаарал болгоомжтой байхыг од эрхэс сануулж байна.
- Манай улсын голлох валют болох ам.долларын ханш 2635.00 төгрөгтэй тэнцэж байгаа бол бусад валют болох рубль 41.10, юань 392.40, вон 2.32 төгрөг байна.
Өнөөдөр болох онцлох үйл явдлууд:
- 14.00 цагт Монгол Улсын Шинжлэх Ухаан Технологийн Их Сургуулийн Барилга, Архитектурын сургуульд Авто зам, Гүүрийн “Виртуал загварчлал, симуляцийн лаборатори”-н нээлт болно.
- 09.00-17.00 цагт, МХЕГ-ын Хурлын танхимд "Байгаль орчны бохирдол, доройтлыг бууруулах нь" сэдвээр улсын байцаагчдад сургалт зохиогдоно.
- 14.00 цагаас УИХ-ын гишүүн, Ардчилсан намын дарга С.Эрдэнэ Орон сууц, гэр хорооллын дундын өмчлөлийн эд хөрөнгийн тухай болон Сууц өмчлөгчдийн холбооны эрх зүйн байдлын тухай хуулийн төслөө УИХ-ын дарга Г.Занданшатарт өргөн барина.
- Агаар, орчны бохирдлыг чиглэлээр үйл ажиллагаа явуулдаг 30 гаруй ТББ-ын уулзалт 09.30 цагт “Puma Imperial” зочид буудалд болно.
- Багш нарын VII их хурал Төрийн ордонд эхэлнэ.
- Ерөнхий сайд У.Хүрэлсүх СХД,СБД-ийн нутаг дэвсгэрт гэр хорооллууд дунд баригдаж буй дэд төвүүдийн барилгын ажлын явц, гүйцэтгэлийн байдлыг газар дээр очиж шалгана.
Энэ өдөр дэлхийн түүхэнд:
- Өнөөдөр Дэлхийн паркинсоны өдөр тохиож байна.
- 2006 онд Ираны ерөнхийлөгч Махмуд Ахмадинежад улсынхаа хэмжээнд ураныг амжилттай хөгжүүлж байгаагаа олон улсад зарлажээ.
- 2002 онд Венесуэлийн ерөнхийлөгч Уго Чавезын эсрэг 200 гаруй хүнийг хамарсан жагсаал Каракас хотод болжээ. Бослогыг ерөнхийлөгчийн тушаалаар хүч хэрэглэн тарааж, 19 жагсагч амиа алдав.
- 1993 онд АНУ-ын Охайо мужийн Лукасвиль хотод орших Өмнөд Охайгийн хорих газарт 450 хоригдол бослого дэгдээв. Исламын шашин болон Исламын үндэстэн хөдөлгөөний гишүүдийн дэгдээсэн уг бослого 10 хоногийн турш үргэлжилжээ.
- 1987 онд Йорданы хаан Хуссейн, Израйлийн гадаад харилцааны сайд Шимон Перес нар хамтран ажиллах нууц гэрээнд гарын үсэг зурав.
- 1979 онд Угандагийн дарангуйлагч Иди Аминий засаглал нуран унажээ.
- 1976 онд Технологийн алдарт Apple компанийн Apple I компьютерийг бүтээж дуусгав.
