Монголбанк, “Тэнхлэг зууч” компанитай хамтран өнгөрсөн сарын орон сууцны үнийн индексийг өчигдөр танилцууллаа. Уг судалгаагаар орон сууцны үнийн индекс 1.01 хувьтай гарчээ. Энэ нь өмнөх жилийн мөн үеэс 0.6 хувиар нэмэгдсэн үзүүлэлт юм.
Шинэ орон сууцны ам метрийн дундаж үнэ 2.090.000 төгрөгт хүрч, өмнөх сараасаа 3.3, өнгөрсөн оны мөн үеэс 3.01 хувиар өссөн байна. Хан-Уул дүүрэгт шинэ орон сууц хамгийн өндөр үнэтэй байгаа бол Сонгинохайрханд хямд буй юм. Харин хуучин хоёр өрөө байрны дундаж үнэ 72.2 сая төгрөг болж, жилийн өмнөх үеэс 6.2 хувиар хямдарчээ. Тус индексийг тооцохдоо тухайн сард зах зээлд нийлүүлсэн шинэ, хуучин 4986 орчим орон сууцыг хамруулсан гэнэ.
Уг үзүүлэлтийг 2013 оны эхнээс тооцсон бөгөөд орон сууцны үнэ 2014 оны сүүл үеэс хямдарч эхэлсэн аж. Хоёр жил гаруй үргэлжилсэн орон сууцны үнэ анх тооцож байсан үеийн түвшинд хүрсэн гэнэ. “Тэнхлэг зууч” компанийн гүйцэтгэх захирал Д.Должинсүрэн “Өнгөрсөн сард шинэ орон сууцны борлуулалт 30, хуучин нь 40 гаруй хувиар өссөн. Хуучин орон сууцны үнэ буурсан нь борлуулалт нэмэгдэхэд хүргэж байгаа юм. Харин түрээсийн нэг өрөө байрны дундаж үнэ 432, хоёр өрөө 560, гурван өрөө 685, дөрвөн өрөө 860 мянган төгрөг байна. Ипотекийн зээлийн санхүүжилтийн эх үүсвэр багассан, орон сууцны нийлүүлэлт нь эрэлтээсээ давж байгаа зэрэг нь ерөнхий үнийн индексийг тогтвортой байлгахад нөлөөллөө” гэв.
