Нийслэлийн Баянзүрх дүүргийн XXII хорооны нутаг Монелын Баруун Алтан-Өлгийд бага сургууль, цэцэрлэгийн цогцолбор ашиглалтад орууллаа. Улаанбаатарын 83 байршилд бага сургууль, цэцэрлэгийн цогцолбор барихаар нийслэлийн ИТХ 2013 онд шийдвэрлэсэн. Үүний 16-г нь сургууль, цэцэрлэггүй хороодод хамгийн түрүүнд барьж байна. Ингэхдээ орчин тойрныг нь тохижуулан, замыг нь засаж байгаа аж. Баянзүрх дүүрэгт сүүлийн гурван жилд бага сургууль, цэцэрлэгийн гурван цогцолборын үүдийг нээжээ. Үүний нэг нь энэхүү 137 дугаар бага сургууль, 212 дугаар цэцэрлэг юм. Бага сургууль нь 180, цэцэрлэг нь 120 хүүхэд хүлээн авах хүчин чадалтай. Спорт, урлагийн заал, цайны газартай энэ цогцолборт Алтан-Өлгийн 4-5 дугаар хэсгийн 13-20 дугаар гудамж, Баруун Алтан-Өлгийн 1-4 дүгээр хэсгийн 21-37 дугаар гудамж, Бунханы 1-4 дүгээр гудамж, Монелын 11-13 дугаар хэсгийн 32-53 дугаар гудамжны хүүхдүүд хамрагдана.
