2024 онд зодог тайлсан теннисчид 

2024 он улиран одох дөхөж, шинэ жил айсуй. Энэ цаг мөчид 2024 онд их спортоо орхисон алдартай теннисчдийг танилцуулъя.

Рафаель Надаль

Түрүү: Ганцаарчилсан 92, хосын 11
“Их дуулга”-д үзүүлсэн амжилт: 22 удаагийн аварга
Чансааны оргил үзүүлэлт: 1
Хожил, хожигдлын харьцаа: 1161-252
Гол амжилт: “Ролан гаррост”-т 14 удаа түрүүлсэн, 912 долоо хоног шилдэг 10-т багтаж дээд амжилт тогтоосон, олимпын наадамд ганцаарчилсан, хосын төрөлд аваргалсан цор ганц теннисчин.

Испани тамирчны агуу карьерын тухай и­хийг өгүүлж болно. Гайхалтай тоон үзүүлэлт, тал­бай дээрх хөдөлмөрч тоглолт, давуулалтын өм­­нөх өвөрмөц хөдөлгөөн гэх мэт. Гэвч сүү­лийн хэдэн жил өөрт нь садаа болж байсан гэмт­лийн улмаас Р.Надаль энэ онд зодог тай­ла­хаас өөр аргагүй болсон юм. Тэрбээр хөг­жөөн дэм­жигч­­дэдээ хандаж өөрийг нь “Мальор­ка­гийн жи­жигхэн тосгоны сайн хүн” хэмээн санан дур­саж байхыг хүссэн билээ.

Энди Маррэй

Түрүү: Ганцаарчилсан 46, хосын 3
“Их дуулга”-д үзүүлсэн амжилт: 3 удаагийн аварга
Чансааны оргил үзүүлэлт: 1
Хожил, хожигдлын харьцаа: 832-290
Гол амжилт: “Их дуулга”-д 77 жилийн дараа түрүүлсэн анхны британи теннисчин, 79 жилийн дараа “Дэвисийн цом”-д шигшээ багаа түрүүлүүлсэн, олимпын наадмын хошой аварга (ганцаарчилсан төрөл) цорын ганц тамирчин.

Их дөрвөлийн хоёр нь спортоо орхисон учраас 2024 он теннисний түүхнээ гунигт жил хэмээн тэм­дэглэгдэх нь гарцаагүй биз ээ. Энди спортоо ор­хихоо таван жилийн өмнө зарлаж байв. Гэвч өнгөр­сөн зун энэ тухай албан ёсоор мэдэгдсэн нь нэгэн алтан үе өндөрлөж байгааг теннис со­нир­хогчдод ойлгуулсан болов уу. Э.Маррэйг маш хө­дөл­мөрч гэдгээр нь хүмүүс санан дурсана. Эх орон­доо болсон Уимблдон, олимпын наадамд тү­рүүлж, маш хүнд гэмтлийн дараа АТР-ийн тэм­цээнд тэргүүлж байснаас нь үүнийг харж болно. 
2017 онд гуяндаа авсан гэмтэл нь түүний зам­налаа төгсгөх шалтгаан болсон юм. Оймсоо өм­сөхөд ч хэцүү байгаа тухай Э.Маррэй 2019 оны эхээр өгүүлж байв. Гэвч мөн ондоо Ант­вер­пенд болсон АТР тэмцээнд түрүүлснээс гадна 2022 онд дэлхийн чансааны эхний 100, дараа нь 50-д орж ирэв. Хэдий Энди урьдын адил өндөр түв­шинд тоглохыг хичээсээр байсан ч өөр нэг хүнд гэмтэл түүнийг “баяртай” гэж хэлэхэд хүр­гэ­сэн юм. Парисын олимпын наадам түүний оролц­сон сүүлчийн тэмцээн болсон билээ.

Гарбинье Мугуруса

Түрүү: Ганцаарчилсан 10, хосын 5
“Их дуулга”-д үзүүлсэн амжилт: 2 удаагийн аварга, 2 удаа финалд
Чансааны оргил үзүүлэлт: 1
Хожил, хожигдлын харьцаа: 438-236
Гол амжилт: “Их дуулга”, 1000, оны сүүлчийн зэрэг бүх том тэмцээнд түрүүлсэн. “Их дуулга”-ын хоёр тэмцээнд түрүүлж байсан испани бүсгүй 30 насандаа зодог тайл­лаа. Түүнийг Р.Надаль, Э.Маррэй шиг  гэмтэл зовоогоогүй, ер­дөө л тен­нисээ орхих ёстой хэмээн ший­дээд зо­дог тайлсан юм. Г.Му­гу­руса “Их дуулга”-д тү­рүү­­лэх­­­дээ эгч, дүү Уильямсыг финалд хожиж байсан содон түүх­тэй. Тодруулбал, 2016 онд Парист Се­ренаг, 2017 онд Лон­донд Венусийг ялсан. Улмаар дэл­хийн чансааг дөрвөн долоо хоног тэр­гүүлж байв. 2011 онд сүүлчийн авар­гын цомоо хүртжээ.

Анжелик Кербер

Түрүү: 14
“Их дуулга”-д үзүүлсэн амжилт: 3 удаагийн аварга
Чансааны оргил үзүүлэлт: 1
Хожил, хожигдлын харьцаа: 659-375
Гол амжилт: Ш.Графаас хойш “Их дуулга”-д түрүүлсэн анхны герман тамирчин, чансааг тэргүүлсэн хамгийн ахмад эмэгтэй теннисчин.

2011 оны “Америкийн нээлттэй тэмцээн”-ий хагас шигшээд шалгарч огцом тэсрэхээсээ өмнө А.Кербер найман жилийн турш мэргэжлийн тэм­цээнүүдэд оролцжээ. Тэр цагаас хойш гер­ман бүсгүй дээд түвшинд маш тогтвортой тог­лож, 10 жилийн хугацаанд 14 цомын эзэн бол­сон. Тэр дундаа гурван жилийн дотор гур­ван өөр гадаргуутай “Их дуулга”-д түрүүлж байв. Ухаа­лаг, тэвчээртэй, тоглолтыг олон  хувил­бар­тай болгож чаддаг учраас ид үедээ Анжелик өрсөлдөгчдийнхөө хувьд хар дарсан зүүд нь  байсан билээ.

Уэсли Коольхоф

Түрүү: Хосын 14
“Их дуулга”-д үзүүлсэн амжилт: “Уимблдон-2023” тэмцээний хос, “Ролан Гаррос-2022” тэмцээний холимог хосын төрлийн аварга
Чансааны оргил үзүүлэлт: 1
Хожил, хожигдлын харьцаа: 309-195
Гол амжилт: 2022 онд дэлхийн чансааг тэргүүлсэн, 2024 онд “Дэвисийн цом”-д финалдсан

Тэрбээр 35 насандаа зодог тайлсан нь хо­сын төрлийн тамирчны хувьд тун биширмээр ам­жилт билээ. Голланд тоглогч олон жилийн турш хосын төрөлд тууштай тоглосны эцэст 2022 онд чансааг тэргүүлж, 2023 онд “Их дуулга”-д түрүүлэн зорилгоо биелүүлж байв. 
Р.Надалийн адилаар У.Коольхоф өнгөрсөн сард болсон “Дэвисийн цом”-ын финалын үеэр зо­дог тайлж буйгаа зарласан юм. Гэхдээ Р.На­далиас ялгаатай нь Уэсли сүүлийн улиралдаа та­ван тэмцээнд түрүүлж, шигшээ багийн хам­таар “Дэвисийн цом”-д аваргалсан. 
Эдгээр теннисчдээс гадна Д.Тим, К.Ан­дер­сон, Ф.Вердаско, Э.Гулбис, А.Корне, И.Кар­ло­вич, П.Куэвас, К.Жоржи, Д.Браун зэрэг шилд­­гүүд 2024 онд их спортыг орхиод байна.