“Gotcha” энтертайнментаас хүүхэд, багачуудад зориулан “Чухал” фестивалийг энэ сарын 5 буюу ирэх бямба гарагт Төв цэнгэлдэх хүрээлэнд 13.00-19.00 цагт зохион байгуулах гэнэ. Хүүхдэд зориулсан гэдгээрээ анхдагч болж буй уг фестивальд оролцоход үнэ төлбөргүй ажээ. Фестивалийн талаар зохион байгуулагчид өчигдөр мэдээлэл өгсөн юм. Арга хэмжээний хүрээнд циркийн үзүүлбэр, хүүхэлдэйн баатар, зохиомжит жүжиг, үзлэг, оношилгоо, сургалт болох ажээ. Үүнээс гадна хүүхэд багачуудын дуртай дуучин, жүжигчин, хөгжимчин зэрэг олны танил эрхэм хүрэлцэн ирж, нэг өдрийг дурсамж дүүрэн өнгөрүүлэхээр бэлдэж буй гэнэ.
Мөн хүүхэд, залууст зориулан агаарын бөмбөлөг хөөргөх ажээ. Харин 19.00 цагт галт наадам болно. Хүүхэд, залуусыг интернэт орчин, дэлгэцээс түр холдуулах зорилгоор эл арга хэмжээг зохион байгуулж буйгаа хуралд оролцогчид онцолсон. Мөн хүүхдийн аюулгүй байдлыг хангах үүднээс Хан-Уул дүүргийн Цагдаагийн газрын алба хаагч хамгаалалтад гарах юм байна. Эцэг, эх, асран хамгаалагчид 10 000 төгрөгийн тасалбар худалдан авч, хүүхэдтэйгээ хамт оролцох боломжтой аж.
