Вьетнам улсад “Яги” хар салхины нөлөөгөөр их хэмжээний аянга бууж, бороо хүчтэй орох, хөрс нурах эрсдэлтэй тул гэрээсээ гарахгүй байхыг анхааруулжээ. Тус улсын хойд бүс болох Ханой, Халонг, Хайфон, Тханьхоа, Тхайбинь, Тхайнгуен хотод хар салхины хүч их байгаа тул үер, усны гамшгаас урьдчилан сэргийлэхийг Вьетнам дахь Монгол Улсын ЭСЯ-наас анхааруулсан байна.
Салхины гол хүч уржигдар өнгөрсөн бөгөөд хотуудад модод үндсээрээ сугаран унасан байна. Зарим мод автомашины дээрээс унаж эвджээ. Барилгын дээвэр хууларч, цахилгааны тулгуур, айлын байшин нурах, байгууллагын хаяг самбар хэмхрэх зэрэг тохиолдол түгээмэл байгаа аж. Хотын иргэд эвдэрсэн зүйлсийг засах, хогийг нь цэвэрлэхэд оролцож байгаа гэнэ. “Яги” хар салхинаас үүдэн Вьетнамын хойд бүсийн нисэх онгоцны дөрвөн буудлын үйл ажиллагааг түр зогсоожээ.
А.ДӨЛГӨӨН
