2024 оны улсын олимпиадуудын материалуудыг нээлттэй болгосноо Боловсролын яамнаас мэдээлэв. Улсын хэмжээнд энэ онд зохион байгуулсан математик, физик, хими, англи хэл, мэдээлэл зүй, газар зүй, монгол хэл, биологи, техник технологи гэсэн есөн төрлийн хичээлийн олимпиадыг үүнд хамруулжээ. Эдгээр олимпиадын даалгаврыг багш, сурагч тус бүрээр нь дээрх яамны moe. gov.mn цахим хуудсанд байршуулсан байна. Багш, сурагчид энэхүү материалууд дээр ажиллаж, өөрсдийгөө сорих боломжтой аж. Эдгээрээс гадна түүх, нийгэм судлал, орос хэлний олимпиадын даалгаврыг ч нээлттэй болгохыг багш, сурагчид хүссэн байна. Бас өмнөх оны олимпиадуудын даалгавар ч нээлттэй байх нь зүйтэй гэжээ.
М.ОЧ
