МУИС бакалаврын түвшний зарим ангидаа өчигдрөөс цахимаар нэмэлт элсэлт авч эхэллээ. Элсэлтийн бүртгэл долоо хоног үргэлжилж, энэ сарын 19-нд дуусах бол эрх баталгаажуулалт нь 20-22-нд үргэлжлэх нь. Тус сургууль 2024-2025 оны хичээлийн жилийн бакалаврын хөтөлбөрт оюутан элсүүлэх эхний бүртгэлээ зургаадугаар сарын 24-нөөс долоодугаар сарын 8-нд явуулж, эрх баталгаажуулалтыг нь долоодугаар сарын 16-22-нд зохион байгуулсан юм. Тэгвэл энэ удаа оюутан нэмж элсүүлэх боломжтой, анги нь дүүрээгүй хөтөлбөрүүддээ суралцагчдыг дахин бүртгэж байна. Тухайлбал, Бизнесийн сургуулийн даатгал, маркетинг, зочлох үйлчилгээ, Мэдээллийн технологи, электроникийн сургуулийн программ хангамж, мульт медиа технологи, электроникийн инженерчлэл, Инженер, технологийн сургуулийн сэргээгдэх эрчим хүч, био-инженерчлэл, хүрээлэн буй орчны инженерчлэл, Шинжлэх ухааны сургуулийн математик, хими, физик, биологийн багш, аялал жуулчлалын хөтөлбөрт оюутан нэмэлтээр элсүүлэх нь. Төгсөгчид burtgel.num.edu.mn цахим хуудсанд нэвтрэн бүртгүүлэх боломжтой бөгөөд онооны жагсаалтын эрэмбээс шалтгаалан сонгосон хөтөлбөртөө элсэх эрх авах юм.
